Këshilltari dhe njëherësh dhëndri i presidentit amerikan Donald Trump, Jared Kushner, do t’i raportojë Këshillit të Sigurimit të Kombeve të Bashkuara për planin e paqes në Lindjen e Mesme këtë javë, vetëm disa ditë para se Presidenti palestinez Mahmoud Abbas të mbërrijë në New York për të qenë në të njëjtin organ.
Kushner do t’u drejtohet diplomatëve pas dyerve të mbyllura të enjten rreth një plani që Trump zbuloi në Shtëpinë e Bardhë javën e kaluar, tha Marc Pecsteen de Buytswerve, ambasadori i Belgjikës në KB, vendi që mban presidencën e rradhës këtë muaj.
“Ai është i gatshëm t’i përgjigjet çdo pyetjeje rreth planit. Unë mendoj se kjo është një mundësi për të sqaruar disa aspekte të propozimit. Shpresoj që Këshilli i Sigurimit do të jetë në gjendje të bashkohet sa më shumë që të jetë e mundur në këtë çështje. Por unë mendoj se të gjithë ne e dimë, dhe ju e dini, sa janë pozicione të ndryshme,” tha ambasadori belg në KB.
Presidenti palestinez do t’i drejtohet Këshillit të Sigurimit të KB më 11 shkurt, në një takim të planifikuar pasi Trump njoftoi një plan paqeje për të cilën palestinezët thonë se është i njëanshëm në favor të Izraelit dhe se minon shpresat e tyre për të drejtuar ndonjëherë vendin e tyre.
Sipas De Buytswerve, zyrtarët palestinezë po “punojnë” për një projekt-rezolutë që do t’i paraqitet Këshillit të Sigurimit të KB, i cili pritet të refuzojë nismën e paqes të administratës Trump. /tesheshi.com/
