Bashkimi Europian po përpiqet shumë për të gjetur mënyrat e shmangies së efektit domino të votës Brexit edhe në vende të tjera anëtare, e për të ndryshuar “humorin” mes qytetarëve të këtyre vendeve po planifikon nisma të ndryshme, mes të cilave edhe ato për promovimin e idesë së Europës mes të rinjve.
Kështu, BE po merr në konsideratë edhe projektin për t’u dhënë të gjithë europianëve të rinj një biletë falas treni kontinental në ditëlindjen e tyre të 18-të, në mënyrë që ata të udhëtojnë e të njihen me të mirat e lëvizjes së lirë.
Por, duket se ideja po përballet me pengesa të panumërta.
“E admirojmë guximin dhe ambicjen e këtij projekti, dhe jemi gati ta eksplorojmë atë edhe më tutje”, tha komisionerja e BE-së për Transportin, Violeta Bulc në koment të rezolutës që mbështetet nga mjaft ligjvënës të Parlamentit Europian, përfshirë edhe nga blloku qendror konservator.
Ata thonë se biletat e InterRail – që janë abone zakonisht njëmujore që lejojnë të rinjtë të udhëtojnë nëpër rrjetin hekurudhor të Europës sipas dëshirës – do të rindiznin entuziazmin për Bashkimin Europian dhe të bashkonin të rinjtë në përballjen e nacionalizmit në rritje që u vërejt në votimin e Britanisë për t’u larguar nga blloku sikundër dhe në shumë vende të tjera.
“Njerëzit në të gjithë Europën duhet të dinë dhe të mësojnë sesi ta gëzojnë njeri-tjetrin. Dëshira jonë është që sa më shumë të rinj të jetë e mundur… të njohin vendet e tjera dhe të krijojnë miq të rinj”, tha Manfred Weber, aleat i kancelares gjermane, Angela Merkel që drejton grupin më të madh të kësaj legjislature në Parlamentin Europian.
Ai u tregua i vetëdijshëm se nuk do të jetë e lehtë dhe kërkoi bashkëpunim nga operatorë e hekurudhës. Bulc nga ana e saj, tha se Komisioni Europian do të analizojë koston dhe burimet e mundshme të financimit.
Një rit veror për miliona europianë që nga vitet 1970, përdorimi i sistemit InterRail, tashmë lejon udhëtimin në shumë shtete me një biletë. Sistemi përdoret nga rreth 300 mijë njerëz në vit dhe u kushton atyre që janë nën 26 vjeç 479 euro për një muaj të plotë.
Me pesë milionë apo më shumë europianë që mbushin 18 vjeç, kostoja e mundshme dhe dyndja në sistemin hekurudhor drejt destinacioneve popullore, mund të jenë gjigande. Një mundësi, sipas komisioneres Bulc, do të ishte limitimi i numrit të të rinjve, duke ndryshuar kriterin që jo çdo europian që mbush 18 vjeç mund të marrë biletën falas, por procesi të kalojë përmes një lotarie.
Përgatiti: Juli Prifti – /tesheshi.com/
