Opozita do të zhvillojë “mësymjen” e radhës javën e ardhshme duke “sulmuar” parlamentin si nga brenda ashtu dhe nga jashtë.
Burime brenda selisë blu kanë bërë të ditur se të enjten PD-ja do të zhvillojë një protestë gjithë paraditen ku do të kërkojë largimin e qeverisë.
Ndërkohë, deputetët opozitarë nëpërmjet fjalimeve direkt në tv do të frymëzojnë militantët që do t’i shohin me monitor nëpërmjet sheshit përballë.
Plani i opozitës është që çdo javë të zhvillojë protesta në vende e institucione të rëndësishme, krerët e të cilëve janë akuzuar nga opozita për korrupsion.
“Viktima” e radhës e PD-së pas dy javësh do të jetë ministri i Shëndetësisë Ilir Beqaj, dhe më pas ai i Brendshëm, Saimir Tahiri.
Siç mësohet, në pjesën e dytë të aksionit opozitar që nis në muajin e janar, do të zhvillohen protesta duke involvuar edhe grupe të ndryshme shoqërore si studentët, sindikalistët, biznesin e vogël, të përndjekurit politikë etj.
Në këtë pjesë do të praktikohen edhe grevat e urisë, kryesisht të përndjekurit dhe studentët.
Grupi i të përndjekurve do të përsërisë atë që ndodhi para 4 vitesh me grupimin e Gjergj Ndrecës, të cilët në fund i hodhën benzinë vetes dhe u vetëdogjën.
Pikërisht pjesa e grevës së urisë së të përndjekurve do të jetë dhe pjesa më kulmore e valës së protestave të opozitës, të cilët siç tha dhe Basha do të jenë pa kthim…/tesheshi.com/
