Komisioni Evropian mbështet propozimin gjermano-francez për zgjidhjen e çështjes së Kosovës dhe do ta integrojë atë në dialogun Kosovë-Serbi, njoftoi të enjten presidentja e KE-së, Ursula von der Leyen.
Në konferencën për shtyp pas përfundimit të samitit të Procesit të Berlinit, ajo u bëri thirrje të dyja palëve të arrijnë një marrëveshje, duke thënë se ky është një problem që mund të zgjidhet dhe që qëndron në rrugën e pranimit më të shpejtë të rajonit në Bashkimi Evropian.
Kancelari gjerman Olaf Scholz tha se është e nevojshme të kapërcehen konfliktet dypalëshe dhe se është mirë që po zhvillohen bisedime.
Ai tregoi se këtë vit është bërë përparim në zgjidhjen e konflikteve dypalëshe, duke përmendur zgjidhjen e mosmarrëveshjes midis Bullgarisë dhe Maqedonisë së Veriut, e cila mundësoi hapjen e negociatave të anëtarësimit për Shkupin dhe Tiranën.
Scholz shpreson për rezultate të shpejta
“Kjo vlen edhe për Serbinë dhe Kosovën, të cilat duhet të arrijnë një marrëveshje. Qeveria gjermane dhe franceze, si dhe KE-ja, po përpiqen ta bëjnë këtë të mundur dhe kjo është arsyeja pse ne jemi kaq aktivë në diskutime me të dyja palët. Shpresojmë se do të arrihet shpejt progresi në procesin e dialogut mes dy qeverive dhe do të pasojë një marrëveshje”, theksoi Scholz në një konferencë për shtyp në Berlin.
Ai tha se shpreson për rezultate të shpejta.
Kryeministri Rama tha gjithashtu nga ana e tij se plani i ri ofron një mundësi unike jo vetëm për Kosovën dhe Serbinë, por për të gjithë rajonin.
“Shpresoj që të dyja palët ta marrin seriozisht dhe të kuptojnë se tani është koha për të dhënë një kontribut të rëndësishëm në arkitekturën e përgjithshme evropiane,” tha ai. /tesheshi.com/
