Komisioni Evropian ka zbuluar një plan ekonomik dhe investimesh për Ballkanin Perëndimor, i cili parashikon deri në 9 miliardë euro ndihmë për rajonin gjatë 7 viteve të ardhshme dhe një garanci për të ulur kostot e financimit, të cilat mund të mobilizojnë deri në 20 miliardë euro në investime gjatë dekadës së ardhshme.
“Ne do të mobilizojmë deri në 9 miliardë euro për iniciativa kryesore të investimeve në fushat e transportit, energjisë dhe tranzicionit të gjelbër dhe dixhital, në mënyrë që të arrijmë një rritje të qëndrueshme dhe të krijojmë vende të reja pune. Plani gjithashtu ofron një rrugë drejt integrimit të suksesshëm ekonomik rajonal, për të përshpejtuar konvergjencën me “Plani duhet të kontribuojë në transformimin e Ballkanit Perëndimor në një nga rajonet më tërheqëse për investime në botë,” tha Komisioneri i Zgjerimit i BE Oliver Varhelyi, duke paraqitur paketën për zhvillimin.
Sa i përket Shqipërisë, investimi kryesore do jetë “autostrada blu”, e cila nis nga Kroacia dhe përfundon në Greqi, duke kaluar përmes Malit të Zi dhe Shqipërisë.
Gjithashtu do të financohet përfundimi i tubacionit të gazit Adriatik-Jon në Shqipëri dhe përgjatë bregdetit, i cili do të mundësojë diversifikimin e rrugëve të furnizimit me gaz.
Ndër dhjetë iniciativat prioritare janë dhe ndërtimi i hidrocentraleve në Shqipëri, Mal të Zi dhe Kosovë, si dhe ferma me erë dhe termocentrale në Maqedoninë e Veriut.
Ekziston edhe rinovimi i energjisë në ndërtesat publike dhe private, të cilat zënë 40 përqind të konsumit të energjisë në Ballkanin Perëndimor.
Rinovimi energjetik i ndërtesave do të kontribuojë ndjeshëm në uljen e emetimeve të gazrave serë dhe përmirësimin e standardit të jetesës dhe shëndetit të qytetarëve.
Do të financohet gjithashtu ndërtimi i një qendre të hedhjes së mbeturinave në Serbi, Shqipëri, Mal të Zi dhe Maqedoni Veriore.
Në mënyrë që ekonomitë e Ballkanit Perëndimor të lidhen më mirë me BE dhe me njëri-tjetrin, rajoni duhet të këmbëngulë në zbatimin e reformave, thellimin e integrimit ekonomik rajonal dhe zhvillimin e një tregu të përbashkët rajonal, me qëllimin për ta bërë rajonin më tërheqës për investime.
BE do të kërkojë ta sjellë rajonin më afër tregut të vetëm europian, tha KE.
Prodhimi i brendshëm bruto (PBB) i të gjithë rajonit është rreth 100 miliardë euro dhe investimet e njoftuara mund të arrijnë deri në 30 përqind të PBB-së, tha Varhelyi. /tesheshi.com/
