Presidentja e Komisionit Evropian Ursula von der Leyen prezantoi të martën një plan me pesë pika për armatosjen e Evropës, i cili mund të mobilizojë afro 800 miliardë euro për mbrojtjen.
“Evropa është e gatshme të marrë përgjegjësinë, ajo mund të mobilizojë afër 800 miliardë euro për shpenzimet e mbrojtjes për një Evropë të sigurt dhe elastike”, tha Von der Leyen, duke paraqitur planin që ajo po propozon para liderëve të vendeve anëtare të Bashkimit Evropian, të cilët do të mblidhen në një samit të jashtëzakonshëm të enjten.
Ajo theksoi se tani është koha për t’u armatosur dhe se Evropa është e gatshme të rrisë masivisht investimet e saj në mbrojtje, në afat të shkurtër për të ndihmuar Ukrainën, por edhe në afat të gjatë në mënyrë që Evropa të marrë përgjegjësinë për sigurinë e saj.
Pika e parë e planit është të lejojë shtetet anëtare të tejkalojnë rregullat që përcaktojnë se deficiti buxhetor nuk duhet të kalojë tre për qind të PBB-së. Prandaj, shtetet anëtare do të mund të tejkalojnë kufirin e deficitit buxhetor nëse këto fonde shpenzohen për mbrojtjen.
“Nëse shtetet anëtare rrisin shpenzimet e mbrojtjes me një mesatare prej 1.5 për qind të PBB-së së tyre, kjo do të krijonte hapësirë fiskale prej afro 650 miliardë euro për një periudhë katërvjeçare”, tha Von der Leyen.
Investimet në mbrojtje
Pika e dytë e planit parashikon një instrument të ri prej 150 miliardë eurosh kredi për vendet anëtare për investime në mbrojtje.
Këto fonde do të përdoren për mbrojtjen ajrore dhe raketore, sistemet e artilerisë, mjetet ajrore pa pilot me raketa dhe municione, sistemet anti-drone, si dhe për të adresuar nevoja të tjera nga lëvizshmëria kibernetike në atë ushtarake.
“Kjo do t’i ndihmojë vendet anëtare të blejnë së bashku dhe me këto pajisje ata mund të rrisin masivisht mbështetjen e tyre për Ukrainën,” tha presidentja e Komisionit Evropian.
Prokurimi i përbashkët do të mundësonte kosto më të ulëta, do të reduktonte fragmentimin, do të rriste ndërveprueshmërinë dhe do të forconte bazën industriale të mbrojtjes.
Pika e tretë ka të bëjë me përdorimin e buxhetit të BE-së për investime në mbrojtje. Von der Leyen njoftoi se do t’u propozonte vendeve anëtare që të vendosin vetë nëse duan të përdorin fondet e kohezionit për mbrojtje.
Pika e katërt dhe ajo e pestë kanë të bëjnë me tërheqjen e kapitalit privat nëpërmjet krijimit më të shpejtë të Unionit të Kursimeve dhe Investimeve dhe nëpërmjet Bankës Evropiane të Investimeve, tha ajo. /tesheshi.com/
