Azem Vllasi, i njohur tashmë si avokat, u qëllua duke u plagosur në krah. Mjekët thanë se ai është jashtë rrezikut për jetën. Ende nuk dihen arsyet se përse u qëllua dhe nëse kanë të bëjnë me të kaluarën e tij si drejtues i lartë komunist (e vështirë të besohet kjo), me arsyet e profesionit të tij si avokat apo me diç tjetër më private. Tesheshi.com iu ofron një profil të tij si një figurë që ka vendin e vet në historinë e vonshme të Kosovës….
Azem Vllasi , edhe pse për 25 vite nuk ka pasur asnjë rol politik në Kosovë, ai ende ka aureolën si një nga të parët kur u përplas me Sllobodan Milosheviçin.
Por ditët e fundit, avokati i njohur dhe analisti politik u përplas edhe me disa nga përfaqësuesit e demonstratave studentore të vittit 1981.
Vllasi deklaroi se studentët që kërkonin “Kosovën Republikë” e kanë bërë nga pozita ideologjike të lidhura me Enver Hoxhën dhe jo për qasje nacionaliste, duke u rrekur që të quante veten si njeriu reformist që po e mbante Kosovën në statusin e krahinës autonome për ta shtyrë më tutje kur Jugosllavia do të binte drejt Republikës.
Po kjo është thjesht një hipotezë, pasi ngjarjet rrodhën ndryshe.
Po kush është Azem Vllasi, njeriu që në orët e para të paradites së të hënës u qëllua nga dikush duke u plagosur, pa rrezik për jetën?
I lindur në Kamenicë, ai u bë një nga ddrejtuesit e Rinisë Komuniste dhe më pas u ngrit në krye të Lidhjes së Komunistëve të Kosovës, kohë që rastisi me vizitën e famshme të Milosheviçit në Fushë-Kosovë, ku akuzoi policët e Kosovës se po sulmonin serbët e pafajshëm.
Atje Slloboddani mbajti fjalimin e famshëm “akush nuk mund të godasë serbët”.
Dhe pas saj largoi kreun e Lidhjes Komuniste të Kosovës, Azem Vllasi dhe nënkryetaren e LKK-së Kaçusha Jasharin.
Vllasi u zëvendësua nga Rrahman Morina, një njeri i afërt i serbëve që vdiq në rrethana të dyshimta gjatë mbledhjes së Partisë Socialiste Serbe në vitin 1990.
Në vitin 1989 Azem Vllasi u burgos pasi minatorët e Trepçës kërkuan rikthimin e tij it në krye të Lidhjes së Komunustëve të Kosovës. Beogradi e burgosi për “kundërrevolucion”.
Një vit më pas Azem Vllasi u liria edhe pas një presioni të madh ndërkombëtar. Pas burgut ai u transferua në Slloveni, ku pati edhe një aktivitet të pasur publicistik.
Vllasi në vitin 1991 publikoi edhe librin “Mjeshtrit e Errësirës”.
Ka bërë çudi se pas viteve ‘90 Vllasi kurrë nuk u përfshi në politikën e Kosovës, edhe pse ish-bashkëpunëtorja e tij, Kaçusha Jashari krijoi Partinë Socialdemokrate dhe pas çlirimit të Kosovës u bë një aleate e Hashim Thaçit.
Vllasi punoi si avokat, kryesisht me çështje që kishin të bënin me arsye civile e penale, por të lidhura me institucione të Serbisë si prona, pencione por edhe arrestime etj. Gjatë kësaj kohe Azem Vllasi mori pjesë në debate publike e analiza të zhvillimeve politike.
Ai nuk u përzie në politikë, përveçse u vetëpropozua publikisht si ambasador i parë i Kosovës në Serbi kur kjo e fundit të njohë pavarësinë e Kosovës.
Në disa debate televizie ka përkrahur shpesh kauzën dhe manovrat e Vetëvendosjes, por kurrë tezën thelbësore të saj mbi bashkimin me Shqipërinë.
Vllasi është një nga pëkrahësit e fortë e mëvetësisë jo vetëm politike të Kosovës dhe ka qenë gjithmonë kritik i lidhjes së fortë me Shqipërinë.
Vllasi ka parë gjithmonë Tiranën prapa protestave të vitit ‘81 dhe nuk ia fali kurrë, madje sulmoi fuqishëm përfaqësuesit e saj si marksistë dhe se kanë ndikuara ata në heqjen e autonomisë së Kosovës në vitin 1989.
Ndaj dhe nuk u puq kurrë me politikanët e dalë nga UÇK-ja.
Po kush e kishte të drejtë në fakt? Këtë duhet ta nxjerrë historiografia e Kosovës. /tesheshi.com/
