Referendumi në Maqedoni mund të konsiderohet i “dështuar” nga pikëpamja e pjesëmarrjes në të, rreth 40 përqind, pra pa e kaluar pragun e 50-përqindëshit.
Por zërat qeveritare thanë se edhe me kaq pjesëmarrje, marrëveshja me Greqinë për emrin e ri e ka marrë një farë legjitimiteti, e tani do jetë parlamenti që do vendos përfundimisht. Zv/kryeminstri Bujar Osmani, dha një shpjegim të tillë cituar nga TCH.
“Sot kishim referendum konsultativ, për të marrë opinionin e shumicës së qytetarëve për marrëveshjen me Greqinë. Kjo dalje në votime që kishim sot, rreth 40%, i jep legjitimitet të plotë marrëveshjes me Greqinë”, tha Osmani.
Edhe kreyeparlamentari Talat Xhaferi, foli për sukses të referendumit, pavarësisht rezultatit të ulët të pjesëmarrjes.
“Qytetarët vendosën për themelet e ardhshme të Maqedonisë. Qytetarët treguan se i përkasin familjes së madhe evropiane”, tha zyrtari i lartë shqiptar.
Por kryeministri Zaev ishte më i ftohtë dhe më realist, duke lënë një shteg dhe për zgjedhje të reja.
“Vota e qytetarëve, e atyre që votuan, duhet të shndërrohet në vullnet politik në dhomën ligjdhënëse. Kemi shumicë të madhe ‘pro’ nga ata që votuan, atëherë është e qartë e ardhmja. Vota e deputetëve duhet të jetë votë ‘pro’ NATO-s dhe BE-së, për jetë më të mirë për fëmijët tanë dhe Maqedonisë. Pres që deputetët e VMROP-së të respektojnë vullnetin e qytetarëve. Në të kundërtën nëse nuk ndodh, atëherë duhet të ketë zgjedhje parlamentare menjëherë”, tha Zaev.
Nga ana tjetër, lëvizja maqedonase “Për bojkot”, ka nisur të festojë në sheshe. /tesheshi.com/
