Pjerin Ndreu, ish-deputet e sot kryebashkiak i Lezhës, është rebeluar sërish ndaj qeverisë, së cilës dhe i takon politikisht. Kësaj here për moslejimin e dasmave, apo dhe ndëshkimin e organizatorëve të tyre.
Kjo është parashikuar në aktin normativ në kuadër të masave anti-COVID, por që Ndreut i duket pa sens, ndaj dhe vihet krah atyre që kundërshtojnë këtë masë. Pos kësaj, edhe ai pretendon se ka selektivitet në ndëshkim.
“Jam pro shqetësimit të pronarëve të lokaleve të dasmave në Lezhë. Që ka diskriminim me qytetet e tjera është krejt e qarteë Gjithkush e di se dasmat në Shkodër, Tiranë, Durrës, Vlorë etj. nuk i ndalon askush. Shqetësimi ynë është adresuar disa herë.
Dikush do dalë të thojë se Akti Normativ thotë këtë dhe atë. Po dakord, po njëlloj për të gjithë. Ose një protokoll me numër të limituar pjesëmarrësish, sepse është shumë e rëndë ti ndalosh dasmën tjetrit. Ata që i shkruajnë ca gjëra si duket se kanë haberin se ça domethanë me të prishë dasmën”, është shprehur Ndreu.
Më parë, ai kundërshtoi dhe aksionin qeveritar të prishjes së disa ndërtimeve në bregdetin e Shëngjinit, duke u përplasur madje dhe me ministrin Lleshaj. /tesheshi.com/
