Gerard Pique është shndërruar në njër prej armiqve më të mëdhenj të Real Madrid-it, dhe jo vetëm. Deklaratat e pamatura të mbrojtësit spanjoll, sikurse ndaj klubit madrilien po ashtu edhe ndaj kombëtares spanjolle, kanë bërë që Pique të jetë i padëshiruar në shumicën e qyteteve në Spanjë.
Pique së fundmi ka ofenduar bashkëpatriotin e tij në kombëtaren spanjolle, Alvaro Arbeloa-n, të cilin e quajti “lepur i panjohur”, pas deklaratave të këtij të fundit të bëra për mbrojtësin azulgrana.
Në momentet më të mira të festës, Pique nuk harron të thumbojë rivalin e tij të përjetshëm, Real Madrid. Gjatë festimit të tripletës së Barçës, Pique kishte thënë:
“Faleminderit Kevin Roldan. Me ty filloi gjithçka”, ishte fjalimi i shtatëlartit blaugrana, që kështu kishte përqeshur futbollistët e Real Madrid-it, që kishin festuar ditëlindjen e Ronaldos së bashku me këngëtarin kolumbian, menjëherë pas disfatës turpëruese ndaj Atletico Madrid, (4-0).
Në një tjetër festë, atë të Superkupës së Europës, Pique sërish kishte ironizuar me madrilienët:
“Shkojmë për të festuar djema, le të plasin madrilienët”.
Eleminimi i turpshëm i Real Madrid nga garat e Kupës së Mbretit, gjithashtu nuk iku pa u komentuar nga Pique. Ai kishte dërguar disa simbole në forme shakaje në rrjetin social twitter, me ç’rast filluan kundërthëniet me futbollistët rivalë të Real Madrid-it.
Mbrojtësi spanjoll po kalon në një periudhë jo fort të mirë, pothuajse në të gjitha stadiumet në Spanjë ai vazhdon të vërshëllehet, pasi kishte përkrahur tifozët katalunas që vërshëllyen himnin e Spanjës, gjatë finales së Kupës, ndaj Athletic Bilbao-s. /tesheshi.com/
