Djali 2-vjeçar, i cili u bë i njohur në të gjithë botën pasi konsumonte një numër të madh cigaresh çdo ditë dhe kishte një peshë të stërmadhe, ka arritur të normalizojë situatën e tij shëndetësore dhe është kthyer në një kampion në shkollë.
Aldi Rizal “u bë i famshëm” në vitin 2010 pasi u zbulua në një fshat të varfër në Indonezi. Djaloshi konsumonte deri në 40 cigare çdo ditë dhe i pëlqente jashtë mase të udhëtonte me triçikël.
Dy vite më pas i vogli pranoi ndihmën që i dha qeveria e Indonezisë për një rehabilitim të veçantë dhe për fat të keq varësinë nga duhani e zëvendësoi me varësinë ndaj ushqimit duke shtuar shumë në peshë.
Tani 9-vjeçari ka arritur të heqë dorë nga konsumi i cigareve, ka humbur peshën e shumtë trupore dhe është një nxënës i shkëlqyer në shkollë.
Më parë ai konsumonte ushqime yndyrore dhe 3 kanoçe me qumësht të kondensuar. Mamaja u shpreh se Aldi godiste kokën në mur nëse nuk i jepje për të ngrënë dhe ishte shumë e vështirë që ta ndaloje atë së ngrëni.
Familja e Aldit vendosi që ta çonte atë tek një nutricien për të nisur një dietë drastike. Vogëlushi peshonte 24 kg kur mbushi 5 vjeç, 5 kile mbi peshën e lejuar për moshën e tij. Specialisti i pediatrisë William Nawawi tha se pirja e duhanit mund të ketë kontribuar në problemet e peshës së Aldit.
“Gjaku nuk ishte në gjendje që të asgjësonte glukozën. Kjo e bënte Aldin që të bëhej gjithnjë e më i madh”, tha mjeku. Por pas 4 vjetësh, pas një diete strikte me fruta dhe perime të freskëta, Aldi humbi peshën trupore dhe tani po përfundon klasën e katërt./tesheshi.com/
