Autoritetet italiane duken krejt të pakënaqura me shpjegimet jobindëse, sipas tyre, të zyrtarëve egjiptianë mbi vdekjen e studentit dhe hulumtuesit Giulio Regeni.
Një student i Kembrixhit, 28-vjeçari italian u zhduk në Kajro mbrëmjen e 25 janarit, për t’u gjetur një javë më pas në rrugën mes kryeqytetit egjiptian dhe Aleksandrisë. Gjysmë i zhveshur dhe me shenja dhune, si shkak për vdekjen e tij u dhanë arsye ordinere. Por organizatat e të drejtave të njeriut pretendojnë se djegiet dhe plagët në trupin e të riut italian janë tipike të metodave të torturave të përdorura nga shërbimet egjiptiane të sigurisë për të shtypur opozitën.
Përkundër kësaj, autoritetet egjiptiane e kanë mohuar kategorikisht përfshirjen e agjentëve të sigurisë në vrasjen e italianit.
Vdekja tragjike e Regeni-t po trajtohet ndërkaq si çështje dinjiteti në Itali, teksa ka patur dhe kërcënime për sanksione ndaj Egjiptit.
Paolo Gentiloni, ministri italian i Punëve të Jashtme, i ka paralajmëruar egjiptianët se durimi i Italisë po merr fund.
“Nëse nuk ka një ndryshim ritmi [nga Egjipti],” ka deklaruar ai sot, “Italia është gati të reagojë duke marrë masa të menjëhershme dhe proporcionale.”
“Nuk do ta lëmë dinjitetin e Italisë të nëpërkëmbet,” kanë qenë fjalët e tij para senatit italian.
Megjithatë, gjërat duket se po lëvizin, pasi prokurorë italianë dhe egjiptianë janë takuar sot në Romë. Gentiloni e ka përshkruar këtë si një takim kritik për të gjetur një zgjidhje të çështjes.
Në anën tjetër, prindërit e të riut italian kërkojnë një reagim më të fuqishëm të vendit të tyre.
Tërheqja e ambasadorit, shkurajimi i studentëve dhe hulumtuesve për të vajtur në Egjipt, ndalimi i udhëtimeve, zbritja e marrëdhënieve diplomatike në një nivel të ulët, e pezullimi i takimeve ndërqeveritare, janë masat që mund të marrë Italia nëse shpjegimet e Egjiptit për vdekjen e 28-vjeçarit mbeten sërish jobindëse. Kështu shprehet një punonjës i shtypit italian, Paolo Valentino.
Por, sipas tij, është e vështirë të mendohet një embargo e mundshme ekonomike, që do ta komprometonte rolin e Italisë si partneri i dytë tregtar i Egjiptit pas Gjermanisë. /tesheshi.com/
