Nga Blendi Gashi
Presidenti Hashim Thaçi dhe kryeministri Isa Mustafa, dikur “armiq” të mëdhenj mes vete, por sot janë bërë aq miq sa që dalin edhe në kafene të kryeqytetit për të pirë kafe.
Edhe pse dy krerët e shtetit mundohen të paraqiten kinse janë shokë të mirë, i gjithë opinioni kosovar, por jo vetëm, e di mirë që një gjë e tillë nuk qëndron, por personat në fjalë janë bërë bashkë për arsye krejt personale, për interesat e tyre ngushtësisht politike.
Mjafojnë të kujtohen akuzat e ndërsjella mes Thaçit e Mustafës të kuptohet se dalja për kafe nuk është se ata e duan njëri-tjetrin, por se është kafe e zorit për të debatuar për çështjen e Demarkacionit me Malin e Zi të cilën marrëveshje e nënshkroi Thaçi, por që po vazhdohet të kundërshtohet me ngulm nga opozita dhe deputet të caktuar të pushtetut dhe jo vetëm.
Përkundër këtyre kundërshtimeve, siç duket “shokët”, Thaçi e Mustafa nuk e kanë ndërmend të lëshojnë pe, dhe për më tepër po përgatiten që t’ua mbushin mendjen deputetëve të partive të tyre që ta japin votën e tyre për ratifikimin e marrëveshjes në fjalë.
Thaçi, duke qenë nënshkrues i marrëveshjes është i vetëdijshëm se nëse nuk ratifikohet ajo në Kuvend do të hidheshin shumë akuza në drejtim të tij për tradhëti ndaj vendit, gjë që sigurisht në takimin e sotëm mund t’ia ketë bërë të qartë Mustafës që nëse marrëveshja nuk kalon atëherë koalicioni do të prishet.
Kështu, presidenti dhe kryeministri janë në një hallë të madh dhe sigurisht se kanë qenë njëzëri që marrëveshja të mos shkojë as në qeveri e jo se jo në kuvend për miratim pa i pasur votat e nevojshme për ratifikim.
Ndërsa 3 gushti është caktuar si date e një tryeze ku do t’i shpalosin faktet pozitë e opozitë si dhe ekspertët e fushës për Demarkacionin, deri në atë kohë sigurisht se Thaçi e Mustafa do të mbajnë takime edhe të tjera mes vete dhe do të bëjnë presion ndaj deputetëve të tyre që t’i thonë po Demarkacionit.
Mediat kosovare për më tepër ditëve të fundit kanë shkruar se dyshja Thaçi-Mustafa kanë nisur edhe “blerjen” e deputetëve të caktuar që mund të dalin kundër Demarkacionit, duke i emëruar në pozita të ndryshme shtetërore, qoftë ata personalisht apo familjarët e tyre.
Por mbetet të shihet nëse presidenti e kryeministri do t’i “blejnë” të gjithë deputetët e partive të tyre që publikisht kanë deklaruar se nuk e votojnë Demarkacionin ose që për momentin aktualisht janë të pavendosur.
Megjithatë, deputetët opozitarë disa herë u kanë bërë thirrje kolegëve të tyre të qëndrojnë palëkundur dhe të mos bien pre e presioneve të shefave të tyre dhe t’i thonë jo Demarkacionit për të mirën e shtetit, pasi siç kanë pohuar opozitarët shteti ynë nuk ka tokë për të falur.
Ja dy fakte pse takimi i sotëm Thaçi-Mustafa është i zorit por jo-miqësor
Hashim Thaçi dhe Isa Mustafa për disa vite me radhë, sidomos në kohën kur i pari drejtonte qeverinë dhe i dyti Prishtinën, kanë hedhur akuza të forta ndaj njëri-tjetrit duke treguar se janë “armiq” të fortë por që u bën bashkë për interesa personale e jo për të çuar përpara shteitn.
Hashim Thaçi, sa ishte kryeministër gjatë fjalimeve në Kuvend, e sulmonte ashpër LDK-në dhe figurat e saj kryesore. Kryesisht akzuat lidheshin për shkak të mosmiratimit të Ligjit për Prishtinën.
Madje, në një deklarim të tij para ligjvënësve Thaçi tha se njerëzit e LDK-së janë plagjiatorë dhe se hetimet për punimet akademike duhet të nisin që nga Isa Mustafa.
Ndërsa Isa Mustafa pas deklarimeve të zyrtarëve të PDK-së se ai mund të arrestohet për keqqeverisje në Prishtinë, pati lëshuar një deklaratë të fortë ku goditej konkretisht Hashim Thaçi.
“Edhe ju po i dëgjoni shërbëtorët e Hashim Thaçit në emisionet e ‘Klan Kosova’ se si po më arrestojnë çdo ditë. Kjo është punë e zagarëve. Hashim Thaçi i ka lëshuar zagarët, sepse po frikësohet që po i shuhet magjja”, deklaroi Mustafa, para se të lidh bashkëqeverisje me Thaçin. /tesheshi.com/
