Pa asnjë diskutim, korrupsioni mbetet njolla më e madhe dhe më e rëndë e qeverisjes Rama, me të vetmen pikepyetje: A ka gisht vetë ai, pra a është nxitës e përfitues personal, apo është thjeshtë i pafuqishëm ta bëjë zap te gjithë ajo ushtri pushtetarësh nga qendra në bazë?!
Gjatë gjithë karrierës së tij politike, drejtpërdrejt ose tërthorazi, ka përcjellë në opinion pakorruptueshmërinë e tij personale, jo thjesht me fraza të thata, por dhe me filozofi jete, mënyrë të menduari.
Pak kohë më parë, do u drejtohej vartësve të tij në pushtet dhe me fraza apo këshilla të tipit klerikal, duke u kujtuar fundin që është varri, vdekja, pa marrë gjë me vete.
Por ndërkohë, metodikën më të madhe të luftuarit të korrupsionit e ka me paralajmërimin se nëse shkon puna të ballafaqimi me drejtësinë i çdokujt që korruptohet, ai apo partia nuk do e mbrojnë dot.
Si përkthehet kjo?
Rama e ka të qartë jo thjesht nivelin e të korruptuarit të ushtrisë së tij qeverisëse, por dhe pashmangshmërinë e fenomenit.
Të korruptuarit sot, në forma të hapura a të kamufluara, është shndërruar në normalitet. Natyrshmërisht, njeriu me pushtet sheh te pushteti dhe një mundësi përfitimi, ku diferencën e bën sa dhe si; nëse është i panginjur dhe mbi të gjitha dhe i paaftë e zorzop, apo e kundërta. Por gjithsesi, përfitimi nga pushteti me tepër se paga mbetet. Ndryshe, pse do duhej pushteti dhe si do të punohej e mbrohej ai në rast betejash politike, nëse nuk do qe ajo mbipaga.
Dhe, me një gjykim fetar, nëse te pushtetari nuk ekziston droja apo frika ndaj Zotit, në bindjen se do t’i dalë një ditë për hundësh ajo që ka përfituar padrejtësisht, në këtë apo tjetrën botë, nuk ka forcë tjetër që mund ta frenojë, edhe nëse vjen nga një familje e mirë e i rritur në një ambient me imponime të forta morale.
Koha që po jetojmë e zhbën lehtë dhe këtë. Njeriu sot, sapo del nga shtëpia, është i dënuar nga çfarë e rrethon që të jetë konsumator të mirash gjithëçfarëshe.
Pra, Rama nuk zgjedh ta luftojë korrupsionin në rrënjë, duke e goditur aty ku nis, te mendësia, te morali fillestar, por te pasoja; ai u kujton të korrptuarve drejtësinë – që nëse kapen duke vjedhur, nuk do kenë atë për ndihmëtar.
Dje, gjatë një takimi në Durrës në kuadër të turit falenderues, ai do godiste ashpër asi individësh në PS, njëherësh me një “mea coulpa” mes rreshtash.
“Kemi bërë gabime. Kemi bërë edhe gjërat për të cilat unë nuk jam krenar dhe do të dëshiroja shumë që të mos i kishim bërë. Nuk flas për ju që jeni këtu, as për Anin, as për Entonin. Flas për udhëheqësa të Partisë Socialiste. Flas për njerëz që kanë marrë gjithçka nga PS, por i kanë dhënë kosto në të gjithë këto vite. Flas për njerëz që kanë marrë detyra të larta, drejtimin e agjencive të rëndësishme dhe kanë turpëruar besimin dhe mbështetjen, flamurin tonë, familjen tonë”, tha ai.
Për të kishte fjalën, thënë këto në një prej zonave të tërmetit? Me gjasë për më famëkeqin e korrupsionit qeveritar, ish-ministrin e Rindërtimit Arben Ahmetaj, tashmë në perëndim si figurë politike, braktisur nga Rama. /tesheshi.com/
