Me dhjetëra njerëz morën pjesë në një koncert të shkurtër në Varshavë, në mbështetje të një pianisti dhe mësuesi kilian që së fundmi pësoi dhunë duke u rrahur nga anëtarët e një bande raciste që e morën për arab. Sulmi ndodhi ndërsa në Poloni vihet re një rritje e madhe e islamofobisë.
Me dhjetëra sirianë të krishterë morën azil në Poloni vitin e kaluar, edhe pse pjesa më e madhe u largua shpejt në drejtim të Europës Perëndimore. Polonia ishte zotuar të pranonte deri në 7 mijë emigrantë, por vetëm një pjesë shumë e vogël e tyre pritet të mbërrijnë këtë viti.
Komisioneri i Polonisë për të drejtat e njeriut, Adam Bodnar, apeloi njerëzit të merrnin pjesë në shfaqje për të treguar solidaritet me
Christiano Ramos, kilianin që u sulmua në tren në afërsi të Varshavës.
Ramos, i cili ka jetuar në Poloni për shumë vjet, humbi një dhëmb dhe pësoi lëndime në kokë për shkak të sulmit. Ai gjithsesi ishte në gjendje të jepte një koncert të shkurtër.
Bodnar tha se dëshironte të bindte Ramosin dhe të tjerë si ai që “kanë shumë miq në Poloni, se shoqëria polake mund të jetë e ndryshme dhe që ai nuk duhet të vendosë për t’u larguar”.
Por, komisioneri Bodnar pranon se ka pasur një rritje të gjuhës së urrejtjes ndaj arabëve në muajt e fundit që është përkthyer në disa raste edhe në incidente të dhunshme.
“Për fat të keq, gjuha e rëndë e urrejtjes kundrejt arabëve përkthehet në incidente të dhunshme urrejtjeje”, thotë ai. “Praktikisht, ccdo dy javë ne identifikojmë një situatë kur dikush është sulmuar për shkak se ngjan “si arab”.
Vitin e kaluar një i krishterë sirian u sulmua në qytetin Poznan në perëndim të Polonisë. Një gjykatë e ka dënuar me dy vjet burg një nga agresorët e tij dhe tjetrin me tre muaj burg. Përgatiti: Ylli Pata – /tesheshi.com/
