Koreja e Veriut thotë se Shtetet e Bashkuara do të pësojnë “dhimbjen më të madhe”, nëse kanë sukses në përpjekjet për imponim të sanksioneve më të ashpra kundër Phenianit në Këshillin e Sigurimit të OKB-së.
Ministria e jashtme koreanoveriore ka paralajmëruar se ky vend “është i gatshëm dhe ka vullnet për të përdorur çfarëdo forme të mjetit të fundit kundër Shteteve të Bashkuara, që do t’i shkaktojnë Amerikës dhimbjen më të madhe dhe vuajtje që asnjëherë nuk i ka përjetuar në historinë e saj”.
Kombet e Bashkuara tashmë kanë miratuar kërkesën e Uashingtonit që sot të votohet për sanksione të reja kundër Koresë së Veriut, për shkak të mosrespektimit të rezolutave të Kombeve të Bashkuara, lidhur me programet e ndaluara atomike dhe të raketave balistike.
Nuk është e qartë nëse Rusia ose Kina, që është aleati kryesor i Phenianit, do të mbështesin masat e reja, pasi Moska dhe Pekini kanë të drejtë të vetos në Këshillin e Sigurimit. /tesheshi.com/
