Dokumentet në lidhje me aplikimin për aprovimin e vaksinës Pfizer / BioNTech kundër COVID-19 u hakuan gjatë një sulmi kibernetik ndaj Agjencisë Evropiane të Barnave (EMA), njoftoi Pfizer të mërkurën.
“Eshtë e rëndësishme të theksohet se as sistemi i BioNTech dhe as Pfizer nuk u dëmtuan gjatë incidentit, por ne nuk e dimë se cilat të dhëna personale u hakuan”, tha Pfizer në një deklaratë.
“Ne jemi duke pritur për më shumë informacion në lidhje me hetimin në EMA dhe ne do të reagojmë në mënyrë të përshtatshme dhe në përputhje me ligjin evropian,” shtoi deklarata.
“Duke marrë parasysh konsideratat kryesore për shëndetin publik dhe rëndësinë e transparencës, ne do të vazhdojmë të sigurojmë informacion të qartë mbi të gjitha aspektet e zhvillimit të vaksinave dhe procesin rregullator,” vazhdoi deklarata.
Agjencia Evropiane e Barnave, e cila aktualisht po shqyrton dhënien e miratimit për disa vaksina kundër COVID-19, tha të mërkurën se ishte shënjestra e një sulmi kibernetik, pa specifikuar kur u krye sulmi ose kush e udhëhoqi atë.
Sulmet kibernetike ndaj institucioneve të kujdesit shëndetësor u intensifikuan gjatë pandemisë COVID-19 dhe hakera të ndryshëm, nga spiunë te kriminelët, po përpiqen të fitojnë njohuritë më të fundit rreth shpërthimit të infeksionit. Agjencitë kanë raportuar më parë se hakerat e lidhur me Korenë e Veriut, Iranin, Vietnamin, Kinën dhe Rusinë janë akuzuar për përpjekjen për të vjedhur informacione në lidhje me virusin SARS-CoV-2 dhe trajtimin e mundshëm.
EMA, e cila kontrollon ilaçet në të gjitha 27 vendet anëtare të BE, do të shpallë një vendim mbi aprovimin e vaksinës Pfizer / BioNTech, e cila tashmë është aprovuar në MB, Bahrein dhe Kanada, më së voni deri në 29 dhjetor. /tesheshi.com/
