E përditshmja greke Kathimerini njofton për pezullimin e të gjitha aktiviteteve futbollistike në vend pas një zjarrvënie të qëllimshme.
Bordi i përkohshëm administrativ i Federatës Greke të Futbollit (EPO) ka vendosur për pezullimin për një kohë të pacaktuar të të gjitha veprimtarive të futbollit në Greqi pas zjarrit të vënë në orët e vona të së martës në shtëpinë e drejtuesit të komisionit të arbitrimit.
Shtëpia e kryetarit të Komisionit Qendror të Arbitrimit, Giorgos Bikas, bën me dije Kathimerini, u dogj natën e së martës, dhe ngjarja është trajtuar si një zjarrvënie e qëllimshme.
Incidenti vjen vetëm më pak se një javë pas kërcënimit të një tjetër anëtari të këtij komisioni, çka çoi në dorëheqjen e tre anëtarëve. Si Federata Greke e Futbollit, ashtu dhe FIFA, patën paralajmëruar se çdo incident tjetër i ngjashëm do të sillte pezullimin e aktiviteteve futbollistike.
Aktivitetet e përfaqësueses greke të futbollit dhe të ekipeve greke në Ligën e Europës nuk preken nga vendimi, pra, nuk do të pezullohen.
Nuk është hera e parë që në Greqi pezullohen veprimtaritë futbollistike. Në të shkuarën po ashtu ka patur ndërprerje për shkak të incidenteve në fushat sportive e jashtë tyre. /tesheshi.com/
