Pasi ministrja e Arsimit Besa Shahini shpalli pezullimin e Rektorit të UT Mynyr Koni, ky i fundit reagoi dukë lënë në fund të refuzimit të tij për ta pranuar argumentimin e ministres një frazë të diskutueshme e një fjalë me thonjëza.
“Edhe një herë, me prononcimin e saj të fundit, u kuptua edhe më qartë se kush e urdhëron Ministren dhe se kush kërkon të ‘gllabërojë’ pasuritë e Universitetit të Tiranës”, shkruan Koni, duke përcjellë aludime vështirë të dëshifrueshme se për ç’gllabërimë bëhet fjalë.
Rektori Koni ka qenë në qendër të kritikave qeveritare që kur shpërthyen protestat studentore. Ai është trajtuar si i padenjë në implementimin e reformës në Arsimin e Lartë. Gjithsesi, ai e kundërshtoi aktin e pezullimit, duke thënë: “Sapo mësova nga media se Ministrja e Arsimit, ka vendosur pezullimin tim nga detyra e Rektorit të Universitetit të Tiranës dhe i paskërka kërkuar Presidentit të Republikës së Shqipërisë, shkarkimin tim.
Dhe këtë vendim e paskërka mbështetur në një inspektim të Ministrisë që ajo drejton.
Në dijeninë time, nga kjo Ministre, nuk ka ardhur asnjë grup inspektimi, sepse, në rast të kundërt, do të isha unë i pari që do ta mësoja një gjë të tillë.
Në fakt ishte e pritshme nga ana ime që situata do të shkonte deri këtu, pas gjithë atyre sulmeve të pashembullta që prej shumë kohësh, janë adresuar ndaj personit tim.
Përpara se të merrte një vendim të tillë, Ministrja duhet të më kishte mundësuar një takim apo të më kishte dëgjuar se çfarë realisht po ndodh në Universitetin e Tiranës, por siç duket, e tremb e vërteta”, shkruan Koni.
Tashmë i takon presidentit Meta ta shkarkojë ose jo njeriun që udhëheq Universitetin e Tiranës, por që nuk është në të njëjtën linjë me qeverinë. /tesheshi.com/
