Reagimi i Beogradit nuk ka qenë në kor për pezullimin e “Zajednicës” nga ana e Gjykatës Kushtetuese të Kosovës.
Ka qenë vetëm Ministria e Jashtme serbe dhe shefi i saj, Ivica Daçiç që kanë reaguar fort duke adresuar tek Uashingtoni dhe Brukseli që të dënojë Prishtinën për shkeljen e marrëveshjes me Beogradin.
“Tani dialogu nuk ka më kuptim”, citohet Daçiç në një deklaratë për televizionin publik që e ka transmetuar edhe radio B92.
Bën përshtypje se ende nuk ka folur Presidenti Nikoliç që gjithmonë është gati për të tilla çështje.
Në fakt Nikoliç e dha një mesazh pas mospranimit të Kosovës në UNESCO, kur tha se Serbia shkon tani në bisedimet me Kosovën më optimiste.
Ndërkaq, kanë nisur negociatat intenzive të diplomatëve serbë me përfaqësuesit e BE-së dhe SHBA-së që të dënojnë politikisht qeverinë e Kosovës.
Siç duket Beogradi e ka konsideruar një hap politik të Kosovës pezullimin e marrëveshjes për Asocacionin e Komunave me shumicë serbe, pikërisht pas presionit serb për mos ta pranuar Kosovën në Organizatën Botërore të Trashëgimisë Kulturore.
Daçiç ka thënë se gjithçka shkon prapa në marrëdhëniet mes Beogradit dhe Prishtinës.
“Thelbi i Marrëveshjes së Brukselit është formimi i Asocacionit të Komunave dhe ky hap i Prishtinës është goditje e madhe në dialogun e Brukselit i cili po e humb kuptimin”, tha shefi i diplomacisë serbe, duke nxitur një përçarje të Prishtinës me Perëndimin. Daçiç tha se Kosova po tallet me komunitetin ndërkombëtar.
“ Tani topi është në fushën e SHBA-së dhe BE-së, pasi nëse do të kishte pezulluar Serbia ndonjë marrëveshje, do të kishte dënime të rrepta për ne”, deklaroi Daçiç.
/tesheshi.com/
