Pas pezullimit të përkohshëm të fondeve amerikane, SPAK, ndër institucionet e shumta dhe në shumë vende që preken nga vendimi i diskutueshëm i administratës së re Trump, reagoi me anë të një deklarate për opinionin. Me një gjuhë të kujdeshme, ajo potencon pavarësinë e saj financiare, por njëherësh dhe rëndësinë e mbështetjes amerikane jo domosdoshmërisht financiare.
“Jemi informuar për Urdhrin Ekzekutiv të Qeverisë së Shteteve të Bashkuara për të ndaluar implementimin e programeve të asistencës ndërkombëtare.
SPAK është një institucion i pavarur, i cili mbështetet tërësisht në buxhetin e shtetit. Ligji 115 i vitit 2024 ‘Për menaxhimin e sistemit buxhetor të Republikës së Shqipërisë’ parashikon edhe buxhetin e miratuar për Strukturën e Posaçme kundër Korrupsionit dhe Krimit të Organizuar për vitin 2025.
Prokuroria e Posaçme dhe Byroja Kombëtare e Hetimit (BKH), prej krijimit kanë pasur mbështetjen e partnerëve ndërkombëtare, përfshirë Shtetet e Bashkuara të Amerikës, të cilët kanë dhënë kontributin e tyre përmes misioneve: OPDAT, ICITAP, DEA, FBI.
Mbështetja e tyre është tejet e rëndësishme për fuqizimin e punës së SPAK dhe konsiston kryesisht në trajnime, vizita studimore, pajisje të ndryshme teknike dhe sistemin e menaxhimit të çështjeve”, thuhet në deklaratën e SPAK-ut. /tesheshi.com/
