Nga faqja e RTSH njoftohet vetëlargimi i Drejtorit të Përgjithshëm të RTSH, Alfred Peza, prak pak muaj pasi i njëjti lajm rezultoi i rremë.
“Alfred Peza ka paraqitur sot dorëheqjen e parevokueshme”, thuhet nga faqja e RTSH-së, ku vijohet më tej:
“Kërkesa për dorëheqje është dorëzuar pranë Këshillit Drejtues të RTSH. I emëruar në këtë detyrë në muajin Qershor të vitit 2023, z. Peza u zgjodh në mënyrë unanime nga KDRTSH.
Në platformën e prezantuar për zgjedhjen në këtë detyrë, z. Peza shpalosi planin ambicioz ‘Për një RTSH sërish të madhe në epokën digjitale’, duke ngritur standardet e RTSH-së dhe duke siguruar që ato të jenë në nivel të shkëlqyer.
Gjatë punës në drejtimin e RTSH-së, z. Peza ndërmori disa reforma të rëndësishme, duke investuar në programe cilësore dhe ekskluzivitete që rritën shikueshmërinë e munguar në televizionin publik. Gjatë një viti si Drejtor i Përgjithshëm i RTSH-së pati një rijetësim të studiove televizive dhe kanaleve të platformës radiotelevizive. Përmes këtyre reformave, RTSH-ja arriti që në një kohë të shkurtër të rikthehet sërish si një zë i rëndësishëm për publikun dhe një aktor konkurrues në tregun mediatik shqiptar.
Alfred Peza ka punuar si gazetar, redaktor, analist mediatik, pedagog dhe Drejtor i Përgjithshëm i disa mediave. Në periudhën 2013–2017 ka shërbyer si deputet dhe nënkryetar i Komisionit të Medias dhe Arsimit në Kuvendin e Shqipërisë. Ai është vlerësuar me çmime dhe tituj të ndryshëm gjatë karrierës së shquar mediatike, ka botuar artikuj të panumërt dhe disa romane”.
Kujtojmë se Peza e morri drejtimin e RTSH-së pas një ftohjeje me Ramën dhe zhvendosje nga politika, si deputet dhe koordinator në PS te kampi mediatik i Irfan Hysenbelliut.
Drejtimi i RTSH-së prej tij u karakterizua, pos atyre që thuhen në njoftimin e mësipërm, edhe nga pushimet e shumta nga puna, diku me të drejtë për shkak të parazitizmit të frikshëm në median shtetërore, por diku dhe pa të drejtë, duke parë emërimet e çuditshme aty të emrave të rrethit të ngushtë të tij nga mediat që ka drejtuar më parë, pa ndonjë gjurmë të dukshme në aftësi profesionale.
Gjithashtu, drejtimi i tij u karakterizua nga përplasja e vazhdueshme me kreun e bordit të RTSH-së, Leka Bungo. /tesheshi.com/
