Islami është feja me rritjen më të shpejtë në botë dhe pritet t’ia kalojë Krishterimit si feja më e popullarizuar para fundit të këtij shekulli, sipas një analize të dalë nga anketat fetare të publikuara të martën nga Pew Research Center.
Me 1.6 miliardë banorë, muslimanët përbëjnë 23% të popullsisë së botës, sipas një vlerësimi të bërë nga qendra Pew e kryer në vitin 2010, në krahasim me 2.2 miliardë të krishterë të cilët përbënin 31% të popullsisë.
Megjithatë, deri në vitin 2050 do të mund të barazohet numri i pasuesve të të dy feve për herë të parë në histori. Arsyet për këtë rritje të shpejtë mendohet të jetë numri më i madh i fëmijëve të lindur muslimanë në krahasim me grupet e tjera fetare, si dhe mosha relativisht e re e muslimanëve.
Përqindja më e madhe e këtyre të fundit ndodhet aktualisht në rajonin e Azisë-Paqësorit, më tepër sesa në Lindjen e Mesme dhe Afrikën e Veriut. Indonesia aktualisht ka numrin më të madh të muslimanëve, por kjo e dhënë mund t’i kalojë Indisë deri në vitin 2050. Deri në atë kohë, është parashikuar gjithashtu që muslimanët do të përbëjnë 10% të popullsisë së Evropës.
Ka pasur diskutime në rritje në muajt e fundit në lidhje me numrin e muslimanëve në Evropë, ndërkohë që politikanët e ekstremit të djathtë, dhe ata anti-islamë të cilët janë rritur dukshëm në numër, po bëjnë thirrje për një ndalimit të imigracionit. Në Gjermani, kancelarja Angela Merkel është përballur me kritika në rritje pse ka lejuar 1 milion emigrantë në vend brenda dy viteve të fundit.
Por një studim i fundit ka treguar se evropianët kanë mbivlerësuar madhësinë e popullsisë muslimane në vendin e tyre. Në Francë, besohej se popullsia muslimane përbënte afro 31 për qind, kurse në realitet ajo është 7.5 për qind.
E njëjta dukuri është vërejtur edhe në Shtetet e Bashkuara. Amerikanët besonin se popullsia muslimane në SHBA përbënte 17 për qind, në vend të numrit real i cili është vetëm 1 për qind. Megjithatë ky numër, gjithashtu, pritet të rritet. Muslimanët pritet të përbëjnë 2.1 për qind të popullsisë së SHBA-së deri në vitin 2050, sipas parashikimeve demografike të Pew Research Center. /tesheshi.com/
