Shkarkimi i ministrit të Drejtësisë Ylli Manjanit nga kryeministri Rama, ka sjellë dhe një precedent në qeverisjen shqiptare, të paktën pas ’90-ës. Petrit Vasili që do ta zëvendësojë është i pari ministër që nuk ka formimin e duhur për atë detyrë, ku kanë shërbyer vetëm njerëz që vinin nga fusha e jurispudencës.
Petrit Vasili, i cili mban detyrën e nr. 2 të LSI-së dhe njihet si një nga njerëzit më të besuar të Ilir Metës, është me profesion mjek. Ai ka ndjekur studimet në Fakultetin e Mjekësisë dhe ka kryer specilizime të plota pasuniversitare pranë Institutit Superior Sanitar në Romë. Gjatë karrierës politike ka ushtruar detyrën e zv/ministrit të Shëndetësisë dhe ministrit të po këtij dikasteri në vitin 2009 gjatë qeverisjes së Metës me Berishën.
Emërimi i tij në krye të Drejtësisë ka thyer rregullin e heshtur të vendosur më parë, të paktën në qeveritë e tranzicionit që nga viti ’92.
Ky dikaster është parë gjithmonë si një punë për juristët, që me emërimin e të parit ministër shqiptar të Drejtësisë nga Ismail Bej Vlora në Qeverinë e Vlorës ka qenë Petro Poga, i cili kishte studiuar në degën e Drejtësisë së Universitetit të Stambollit.
Më tej në qeverinë e stabilitetit në vitin ’91, një qeveri e krijuar për të kaluar situatën politike të kapërcimit nga sistemi komunistër, ishte përsëri një jurist, Shefqet Muçi.
Analisti Afrim Krasniqi shkruan sot se “për herë të parë në historinë e Shqipërisë do të kemi një ministër drejtësie …..mjek infeksionist! Ishte ministër Shëndetësie dhe e shkarkuan për skandale financiare, i akuzuar nga pasuesi i tij që sot është kolegu i tij. Edhe Enveri i kishte ca ministra drejtësie me juridik. Tani që bëmë reformën në drejtësi juridiku nuk ka vlerë, – rëndësia ka partia! Dhe Vasili ka qenë, është e do jetë njeri besnik i udhëheqësit të partisë, kriter i mjaftueshëm për karrierë të gjatë. Kaq”
Historia e shtetit shqiptar ka treguar se në atë karrige kanë qarkulluar vetëm ekspertë të fushës, që kanë kryer studimet në jurispudencë apo kanë punuar në sektorë që i përfshin drejtësia… ose të paktën me Shkencat Politike dhe Marrëdhëniet Ndërkombëtare.
Më poshtë disa prej tyre:
Kudret Çela – Jurist
Ilir Panda – Jurist
Ilir Rusmaili- Jurist
Eduart Halimi-Jurist
Fatmir Xhafa -Jurist
Enkelejd Alibeaj –Jurist (shkolla e Magjistraturës)
Aldo Bumçi – I diplomuar në Marrëdhëniet Ndërkombëtare
Vasil Naço -Jurist
Spartak Ngjela –Jurist
Siç shihet pra, zgjedhja e Petrit Vasilit është krejtësisht politike, ku dy palët, si LSI e si PS e kanë injoruar totalisht specifikën e profilit të postit. Paqja ka zëvëndësuar drejtësinë (kjo e fundit jo në kuptimin institucional apo juridik të fjalës, por në atë moral), ndërkohë që duhej të ishte e kundërta. /tesheshi.com/
