Drejtori i zyrës për Kosovën, Marko Gjuriq, sërish ka hyrë në Kosovë edhe pse Ministria e Punëve të Jashtme ka lëshuar vendim me të cilin i ndalohet hyrja në territorin kosovar.
Por shpjegim për këtë ka dhënë ministri në detyrë në Ministrinë e Jashtme, Petrit Selimi.
Në lidhje me këtë, Selimi ka thënë për mediat kosovare se vendimi për ndalimin e hyrjes së Gjuriqit është shfuqizuar me udhëzim nga ministrja për Dialog, Edita Tahiri.
“Vendimi për ndalimin e hyrjes së Gjuriq është shfuqizuar me udhëzim nga ministrja Tahiri, pas marrëveshjes së arritur në Bruksel para një muaji ku ka qenë pika obligative që Gjuriq zyrtarisht të kërkon falje për sjelljet e tija, ndërsa BE-ja të përpilon kodin e mirësjelljes për këto vizita. Që nga ajo periudhë atij iu ka lejuar tre herë të hyj në territor të Kosovës”, ka thënë Selimi.
Sipas tij, ndalesat permanente për të hyrë në Kosovë janë për, Vojislav Sheshelin, shefin e ushtrisë serbe, Lubisha Dikoviq, si dhe për ministrin e Mbrojtjes së Serbisë kushdo që të jetë në këtë funksion.
