Nga Bardha Nergjoni
Pogradeci është vendi i qetësisë, gjelbërimit, liqerit pa kufi, Lasgushit, Kutelit, Drilonit, Tushemishtit por sidomos i pogradecarëve. Janë të shumtë që e deshën dhe e duan pa kushte këtë qytet. Disave i dhuroi lumturi, të tjerëve dhimbje por ka nga ata që vazhdojnë të frymëzohen nga Pogradeci. Një prej tyre është edhe piktori Petrit Laraku. Një “penel” prodhimtar i qindra pikturave, shok klase me kryeministrin e sotëm piktor, Laraku si çdo verë ka ekspozuar në natyrë punimet e tij më të fundit.
Nuk dëshiron të flasë shumë për shoqërinë e shkollës dhe Edi Ramën e atëhershëm të fiksuar në një fotografi gjatë një praktike mësimore në Gjirokastër.
Gjithmonë frymëzohet nga çdo pjesë e këtij qyteti pasi për të ka aq shumë natyra e qytetit liqenor sa mjafton për një karrierë të gjatë. Petrit Laraku është nga ata piktorë që gjatë gjithë jetës së tij nuk i është ndarë telajos dhe jo vetëm për peisazhet por ka derdhur talentin e tij në pikturë moderne, portrete, etj. Laraku ka mbaruar Liceun Artistik në Tiranë. Nxënës me rezultate shumë të mira, ka pikturuar shumë nga Pogradeci dhe ndër imazhe gjen edhe Lasgushin me qenin e tij besnik. Sot pikturon jo vetëm për pasion por edhe për të jetuar me të ardhurat nga ajo. Në studion e tij në ambientet e qendrës kulturore të fëmijëve duket se koha ndalet. Me aromën e kohës, aty gjen çdo imazh, çdo punim e çdo kujtim të punës dhe pasionit të tij gati 40-vjeçar.
Për jetën e tij, takimin me Lasgushin dhe pikturën flet për herë të parë për tesheshi.com…
Laraku, ka një histori marrëdhënia juaj me pikturën dhe cila është lidhja me kryeministrin Rama?
Pikturën e kam filluar qysh në moshë të vogël. Në atë kohë nuk kishim materiale dhe mbaj mend që kam shkuar në një dyqan dhe kam marrë një bojë të kuqe në tubet. Me atë kam pikturuar petalet e një luleje. Ndoshta aty u dallua që kisha një lloj prirjeje për vizatimin. Vazhdova kursin e vizatimit për 4 vjet dhe më pas Liceun Artistik në Tiranë. Kam qenë në një klasë me Edi Ramën. Kam shumë kujtime nga koha e shkollës.
Si e keni njohur Lazgush Poradecin?
Kam qenë në vit të dytë në lice kur në praktikën e pikturës isha përqendruar në qytetin tim. Në rrugicat e vjetra po pikturoja shtëpitë tradicionale që i gjeni shpesh në pikturat e mia kur Lasgushi dilte çdo ditë nga shtëpia bashkë me qenkën e tij. E mbaj mend shumë mirë dhe nga ai imazh që më krijonte kam realizuar një pikturë. Ishte i heshtur. Vishej me të zeza dhe shëtiste gati çdo ditë buzë gjolit. Më ndiqte ndërsa pikturoja në heshtje por nuk më thoshte gjë. Fliste shumë pak por nga mimika e fytyrës kuptoja se i pëlqente. Pikturën e kam ende dhe mbetet në koleksionin tim të gjërave më të shtrenjta. Së fundi kam bërë edhe bustin e tij.
Pse keni vendosur t’i mbeteni besnik Poradecit duke pikturuar vetëm nga natyra e tij?
Qyteti të ofron shumë mundësi me natyrën e tijtë bukur e të larmishme. Siç e përshkruante dhe Lasgush Poradeci, ky qytet ka një magji të veçantë. Temën e Pogradecit, me stinët me vjeshtën, dimrin, me luhatjet e liqenit që krijohen, me dallgët, njerëzit, pemët, varkat, pulëbardhat, historinë e gjithçka. Nuk kam pse kërkoj më tej pasi të gjitha i kam këtu në Pogradec. Është qyteti që na frymëzon dhe ndoshta është ky qytet që më ka bërë piktor. Mendoj se Pogradeci ka piktorë të mirë që janë kolegët e mi edhe për faktin se nuk mungon frymëzimi.
Sa piktura mund të keni realizuar në këto 40 vite karrierë?
Kam bërë shumë. Nuk mbahen mend sa por mund të them se edhe shes shumë nga punimet e mia. Aktualisht zotëroj një galeri me mbi 200 punime. çdo vit me hapjen e sezonit turistik kam gati një ekspozitë me 60 apo 70 punime. Ekspozitën e çel në natyrë duke qenë se Pogradeci nuk ka galeri artesh.
Ju gjithashtu jeni dhe një mësues shumë i mirë për të rinjtë…
Kam përgatitur dhe përgatis shumë të rinj, në pikturë, arkitekturë, dizenjim, stilim etj. Aktualisht kam të rinj që i përgatis për lice apo shkolla të tjera që kanë lidhje me artin.
Çfarë stili ndiqni në pikturat tuaja?
Unë punoj në stilin e realizimit dhe impresionizmit por kam piktura moderne që i ruaj në studio. Realizoj edhe portrete në bazë të kërkesave apo edhe porosive që me vijnë.
Ju konsiderojnë piktor mjaft prodhimtar. Ku qëndron çelësi i suksesit?
Mendoj se natyra pogradecare ka luajtur rolin e saj por edhe përshtatja me ato çfarë njerëzit duan më shumë dhe pëlqejnë. Kam marrë pjesë në ekspozitë të zhvilluar në Gjermani dhe ajo që mund të them për suksesin e kësaj ekspozite ishte shitja e të gjitha punimeve.
Ju jeni bërë pjesë edhe të një dokumentari…
Besoj se ka qenë rastësi por një grup xhirimi i ardhur këtu në Pogradec realizoi një dokumentar të shkurtër mbi jetën dhe punimet e mia. Ky dokumentar është bërë pjesë e festivalit të filmit. /tesheshi.com/
