Drejtuesit e partive opozitare në Kosovë, në shenjë simbolike për nisjen e aksionit për rrëzimin e qeverisë Mustafa, nënshkruan peticionin përmes të cilit kërkohet kundërshtimi i marrëveshjeve të Brukselit. Opozitarët kanë artikuluar tashmë kundërshtinë etyre ndaj themelimit të Asocacionit të komunave serbe në Kosovë dhe marrëveshjes së demarkacionit të kufirit me Malin e Zi.
Kreu i Vetëvendosjes, Visar Ymeri, ai i AAK-së, Ramush Haradinaj, si dhe ai i NISMA-s, Fatmir Limaj në një dalje të përbashkët publike, vendosën firmat në peticion duke u bërë thirrje qytetarëve që të bëjnë të njëjtën gjë. Sipas tyre, kjo është lëvizja e parë në aksionin antiqeveritar që do të pasohet me protesta në të gjithë vendin.
Liderët e opozitës kërkuan nga qytetarët të shfrytëzojnë këtë mundësi, që zëri i tyre të dëgjohet më shumë në vendimmarrje.
“Ftojmë të gjithë ata që mendojnë se këto marrëveshje janë të dëmshme, të nënshkruajnë peticionin që t’i kundërshtojnë ata që po e rrënojnë vendin”, ka deklaruar Ymeri.
Kreu i AAK-së, Ramush Haradinaj ka deklaruar se marrëveshjet e nënshkruara në Bruksel janë të dëmshme si në aspektin politik, por edhe ekonomik.
“Ky peticion është i gjithë qytetarëve ku secili që e nënshkruan e fuqizon kundërshtimin për marrëveshjet e dëmshme politike financiare-ekonomike. I ftoj të gjithë të përkrahin peticionin. Ky është angazhim i përbashkët i yni”, tha Haradinaj.
Një ditë më parë, opozita bllokoi seancën e Kuvendit me kërkesën që kryeministri Mustafa të raportonte për marrëveshjet e Brukselit, por ky i fundit e ka shtyrë debatin për më datën 22 Shtator, kur zëvendësi i tij, Hashim Thaçi të kthehet nga një vizitë jashtë vendit.
/tesheshi.com/
