Thembra e Akilit vijon të mbetet e njëjta për kombëtaren e Shqipërisë. Futbollistët vijojnë të bëjnë gabime foshnjarake, të shfaqen të fjetur në minutat e para dhe të fundit, e të përpiqen gjatë gjithë ndeshjes pastaj të rregullojnë atë që kanë prishur me këmbët e tyre.
Siç bënë me Portugalinë në eliminatore, siç bënë me Serbinë, siç bënë para ca ditësh me Katarin, e siç bënë mbrëmë me Ukrainën.
Në Bergamo ishte gjithçka festive, me flamuj, me thirrje mbështetëse, me stadiumin plot. Veç janë ukrainasit që gëzojnë, teksa godasin dy herë në fillim të dy pjesëve, e një herë në fund të lojës.
Tanët bëjnë më pas tërë lojën. Por sa vlen? Armando Sadiku shënon sërish, kjo ishte mbrëmja e tij, por vetëm kaq.
Me të tilla gabime mund të kthehesh në skuadër qesharake në Euro 2016. Më mirë më tepër modestë, më mirë më tepër të mërzitshëm, por më së paku të saktë, ndryshe…
Ukraina fitoi 3-1 mbrëmë ndaj Shqipërisë. E veç gabimeve të kuqezinjve, duhet pranuar se ukrainasit kanë qenë të përsosur në zbatimin e detyrave. Janë të njëjtët që fituan ditë më parë 4-3 ndaj Rumanisë.
Për t’iu kthyer edhe një herë përfaqësueses së Shqipërisë, ngushëllues mbetet vetëm fakti që shumë ekipe, kur zhvillojnë takimet të dobëta përgatitore para një veprimtarie të madhe, më pas shkëlqejnë atje. Siç ka qenë rasti shpesh me Italinë, prej dhe nga është trajneri i kuqezinjve. Shpresojmë të ngjasë kështu dhe me kombëtaren shqiptare.
Kosova, nga ana tjetër, zhvilloi miqësoren e parë zyrtare. Në Frankfurt, aty ku dhe u luajt takimi,
atmosfera nuk qe aq entuziaste sa në Bergamo, por kosovarët fituan 2-0 ndaj Ishujve Faroe.
Edhe pse kundërshtari qe modest, fitorja vlen si e tillë, aq më tepër kur është e para që prej njohjes zyrtare të futbollit kosovar nga organizmat europiane e botërore. /tesheshi.com/
