Një paralajmërim i dhënë së fundi nga kryeministri Rama, ka pështjelluar rëndë publikun. Eshtë fjala për ndalimin e qarkullimit me makina në fundjavë, e kjo, që nga tetori e deri në mars, gjithnjë në kuadër të masave anti-COVID.
Por e thënë në kushtet e rikthimit në normalitet, ka ngjarë me një vendimmarrje kontraverse.
“Fundjava pa makina do të mbetet në fuqi edhe dy të shtuna e të diela, për t’u rikthyer pas sezonit të verës ku çdo të diel minimalisht nga tetori deri në marsin e ardhshëm, si një moment të përjavshëm, si një moment duke iu kushtuar mjedisit, të moshuarve dhe fëmijëve e familjeve tona“, ishte ajo çfarë tha Rama.
Por deputetja e mazhorancës Elona Gjebrea, tha gjatë një interviste në A1 Report, se kjo kërkon sqarime të mëtejshme për publikun.
“Jam e bindur që kryeministri merr vendimet e duhura, bazuar te çfarë i rekomandojnë ekspertët. Padyshim që është e nevojshme që të ketë një sqarim për këtë situatë apo propozime dhe të tilla besoj do të jenë në ditët në vijim.
Shqiptarët kërkojnë një sqarim të mëtejshëm të situatës dhe një strategji të daljes apo transformimit nga një fazë në tjetrën dhe ministria po punon për një strategji të detajuar. Mendoj se duhet të kemi akoma më shumë durim.
Është e domosdoshme të përgatitemi për vjeshtën pasi me siguri virusi do të na godasë, varet nga ne dhe tipologjia e virusit.
Qeveria udhëhiqet nga një grup ekspertësh, janë vendimet e tyre që na udhëheqin. Në fundjavë njerëzit kanë tendencën të grumbullohen dhe këto përbëjnë një shqetësim për grupin e ekspertëve për transmetimin e virusit, por fatmirësisht nuk ka atë goditje si në javët pas 15 marsit.
Qytetarët duhet të kenë durim dhe të respektojnë masat. Ka kaluar faza e rrezikut, por nuk ka evidencë që virusi është zhdukur në Shqipëri, prandaj duhen respektuar masat e distancimit, më shumë ndoshta se edhe maskat“, ishte ajo çfarë arsyetoi deputetja Gjebrea. /tesheshi.com/
