Nga Blendi Gashi
Donika Kadaj-Bujupi, katër muaj pas largimit nga Aleanca për Ardhmërinë e Kosovës (AAK) ku qëndroi për 13 vite, ka hedhur ditë më parë akuza të rënda ndaj ish-partisë së saj.
Afera “Pronto”, bëri që Kadaj-Bujupi, të flasë kundër AAK-së së Ramush Haradinajt, parti të cilën e fajësoi për heshtje dhe bashkëpunim të fshehtë me Partinë Demokratike të Kosovës (PDK) që udhëhiqet nga Kadri Veseli.
Depuetja e cila iu bashkua Vetëvendosje-s pas largimit nga AAK-ja, ka thënë se ish-partia e saj duhet të heqë dorë nga marrëveshjet me kriminelët, siç i ka quajtur ajo Hashim Thaçin e Kadri Veselin.
Por ky deklarim i Donika Kadaj-Bujupit, që vitet e fundit mbante postin e shefes së grupit parlamentar të AAK-së aspak nuk iu ka pëlqyer disa zyrtarëve të AAK-së.
Deputetja Teuta Haxhiu, sekretari organizativ Valon Tolaj dhe Bashkim Vishaj, janë zyrtarët e kësaj partie që publikisht i janë kundërpërgjigjur ish koleges së tyre.
“AAK nuk e pyet Donikën se çfarë të bëj”
Portali tesheshi.com, përveç këtyre reagimeve publike, gjatë kësaj jave ka kontaktuar me zyrtarë të lartë të AAK-së, për të marrë një qëndrim të tyre për çështjen në fjalë, por ata nuk kanë preferuar të flasin shumë, duke thënë se një vendim i tillë është marrë nga partia dhe se ka shumë tema tjera më të rëndësishme për ta, se të reagojnë ndaj akuzave që i janë bërë nga ish deputetja e tyre.
“Pas konsultimeve grupi parlamentar i AAK-së ka vendosur të mos jap qëndrim për çështjen në fjalë, pasi për këtë tashmë kanë shprehur mendimin e tyre përmes shkrimeve që kanë bërë në faqet e tyre në Facebook, deputetë e zyrtarë tjerë të partisë”, ka thënë një deputet i AAK-së për tesheshi.com, por që nuk ka preferuar të deklarohet me emër.
Një tjetër zyrtar i lartë i partisë së Ramush Haradinajt, i cili po ashtu ka preferuar të mos deklarohet me emër, ka thënë se AAK është një parti e madhe opozitare që qëndrimet i merr duke u konsultuar me kryesinë dhe strukturat e partisë.
“AAK nuk e pyet Donikën se çfarë të bëj. AAK nuk është duke heshtur, por për momentin më aktuale është tema e Demarkacionit, e jo temat tjera. Së pari AAK është duke punuar çdo ditë dhe do të mundohet ta ndal Demarkacionin, që vendi të mos humb tokë, pasi kjo temë nuk mund të kthehet, kurse për temën për të cilën paska folur Donika, mund të reagohet në vazhdimësi”, ka thënë zyrtari i AAK-së, për tesheshi.com.
“Donikë, lutu mos të dalin ca përgjime…”
Deputetes së Vetëvendosje-s, Donika Kadaj-Bujupi, i janë kundërpërgjigjur ashpër disa zyrtarë të AAK-së të cilët i quajnë akuzat e saj të pabaza dhe për më tepër akuzojnë ish bashkëpartiaken se ka qenë ajo që kërkonte lidhjen e koalicionit me PDK-së sa ishte pjesë e AAK-së.
Zyrtari i parë i AAK-së që është deklaruar për çështjen në fjalë, është sekretari ekzekutiv i Aleancës, Valon Tolaj.
Ai, përmes një postimi që ka bërë në Facebook i është kundërpërgjigjur Kadaj-Bujupit, duke thënë se kjo e fundit sa ishte pjesë e AAK-së ka shprehur dëshirë të hyjë në koalicion me PDK-në.
“Donikë t’i veç lutu mos të dalin përgjimet tuaja, kur t’i i kërkoje Aleancës që me çdo kusht të hynë në koalicion me klanin “Pronto”!”, ka thënë Tolaj.
Deputetja Teuta Haxhiu, është personi i dytë në AAK që i është kundërpërgjigjur Kadaj-Bujupit, duke e quajtur për keqardhje akuzat e bëra nga ish kolegia. Edhe Haxhiu përmes një postimi në Facebook ka shkruar se Donika sa ishte pjesë e AAK-së disa herë është deklaruar pro koalicionit me PDK-në.
“Përnjëmend nuk po mundem asesi të kuptoj kolegen time deputete , Doniken ! I paska rregulluar te gjitha punet tjera me kundershtaret politikë dhe paska filluar të zbrazë vrerë mbi djepin ku u rrit dhe u avansua , madje duke qenë e priviligjuar si askush tjetër në AAK. Eshtë vërtetē për keqardhje reagimi i saj, për shumë arsye, por mbi të gjitha për faktin se ajo i njeh mirë qëndrimet e AAK se sidomos për sa u përket marrëveshjeve të fshehta sic thotë ajo. Pra, sa për kolalicionin e fshehtë mos u merakos . Ka vite që jemi nën ketë presion nga të gjitha qarqet por ne kemi qenë të vendosur në këtë drejtim. Madje ju personalisht shumë herë jeni deklaruar publikisht sa keni qenë pjesë e AAK-së. Mos luaj me fjalët dhe mendimet tua , koha mban mend të gjitha, ajo nuk harron .Shumë keq për të dhe sjelljen e saj të papërgjegjëshme në raport me ish subjektin nga u largua. Pra e kaluara na ndjek hap pas hapi , në këtë rast sa për të na përkujtuar se ju madje keni qenë më e zëshmja për të lidhur koalicion me kete nomenklaturë. Si deputete dhe si AAK jemi të vendosur që në Kosovë të ketë drejtësi për të gjithë pa asnjë përjashtim”, ka deklaruar deputetja Haxhiu.
Zyrtari i tjetër i AAK-së që ka reaguar ndaj deklarimeve të ish kolegës së partisë, është Binak Vishaj, i cili aktualisht është anëtar i KQZ-së nga partia e Haradinajt.
Vishaj, përmes një shkrim në Facebook i është kundërpërgjigjur Kadaj-Bujupit duke i thënë se ajo ia la AAK-së 20 mijë euro borxh.
“E vetmja humbje që Donika Kada ka mund me i shkaktuar AAK-së janë afër 20 mijë euro, që ajo ia la borxh. Donika allahile ku i shpërdorove qato para”, ka deklaruar Vishaj.
Ndryshe, Donika Kadaj-Bujupi ende nuk është deklaruar ndaj akuzave që janë bërë më pas në drejtim të saj nga ish bashkëpartiakët. /tesheshi.com/
