Pas një kohe të gjatë pritjeje, Gjykata Penale eMaqedonisë solli aktgjykimin e parë për të akuzuarit e Prokurorisë Speciale nga bisedat e përgjuara.
Kështu, gjykatësja Dobrilla Kacarska shqiptoi dënimin prej 2 vitesh burg për ish-kryeministrin dhe liderin e VMRO-DPMNE-së, Nikolla Gruevski lidhur me procesin gjyqësor ” Tank” për keqpërdorim të detyrës zyrtare.
Përveç tij, dënim me burg prej 6 vjet e gjysmë iu shqiptua edhe Gjoko Popovskit, ish-ndihmës ministër i MPB-së.
Ata u obliguan të paguajnë edhe harxhimet e gjykimit.
“Është nder të jesh kryeministër. Ai duhet të kujdeset për interesat e qytetarëve. Por edhe çdo funksionar duhet ta dijë se e ka për obligim transparencën ndaj qytetarëve që janë taksapaguesit, dhe mbushësit e buxhetit. Kryeministri nuk guxon që t’i nënçmojë kështu qytetarët siç ka bërë Gruevski. Ai duhet t’a ruajë interesin. Edhe Gjoko Popovski ka keqpërdorur pozitën zyrtare duke dëmtuar interesin publik”, ka deklaruar gjykatësja Dobrilla Kacarska.
Sipas Kacarskës, ai ka porositur makinë luksozë 600 mijë eurosh mbi shpinën e buxhetit të Ministrisë së Brendshme dhe ka kërkuar edhe favorizimin e kompanisë “Mak Auto Start” duke e ditur se ajo është kompania e vetme e cila importon makina të tilla luksoze të tipit Mercedes.
Kacarska kujtoi se gjatë gjykimit janë prezantuar një mori provash në mbështetje dhe kundërshtim të akuzës, por më shumë kanë peshuar ato që e mbështesin. Kacarska tha se është i qartë favorizimi i kompanisë pasi që gjithë specifikat e Mercedesit që i ka vetëm ai, janë vendosur si kusht në tender. Gjykatësja kujtoi se Gjoko Popovski poashtu ka qenë i vetëdijshëm për veprimet e tij.
I akuzuari Nikolla Gruevski nuk ishte në sallën e gjykatës kur shqiptohej dënimi për të, një e drejtë që i takon me ligj.
Si gjatë procesit të gjykimit, por edhe pas shqiptimit të dënimit para gjykatës penale, janë mbledhur dhjetëra qytetarë duke protestuar në mbështetje të ish-kryeministrit. /tesheshi.com/
