Studentë të Mjekësisë apo ata që do jenë të tillë në nisje të vitit të ri akademik, nuk e kanë gëlltitur vendimin e qeverisë për pesë vjet pun në Shqipëri para marrjes së diplomës.
Sipas tyre, kjo që po bën qeveria është e padrejtë.
“Dje ka dalë një vendim absurd dhe marrëzi e radhës që bie ndesh me të drejtat kushtetuese dhe të drejtat themelore njeriut. Na privohet e drejta e lirisë së lëvizjes për punësim ose rritje profesionale. Sipas tyre, ose paguani gjobën ose firmën që për ne është absurditet që kurrsesi nuk mund të pranohet”, tha njëri nga protestuesit e rinj.
Sipas tij, thirrja e studentëve nuk është për t’u larguar, por për të përmirësuar kushtet dhe investime në infrastrukturë.
“Ne duam të qëndrojmë në Shqipëri. Thirrja jonë nuk është për t’u larguar, por për të përmirësuar kushtet dhe investime në infrastrukturën dhe shumëçka që sistemi ynë ka nevojë. Ajo që duam është që qytetarëve t’u ofrohet një trajtim sa më i denjë dhe shërbim cilësor. Thirrja jonë nuk është për t’u larguar, kjo po keqinterperetohet e keqpërdoret nga ata që duan ta përdorin për qëllimet e tyre. Thirrja jonë është që mos i detyroni mjekët, kurrsesi nuk mund të vendosen masa detyruese. Vendimi është antikushtetues dhe i njëanshëm”.
Qeveria tha se është e detyruar të marrë këtë vendim, pasi është shteti që investon për ta dhe ata duhet t’i shërbejnë popullit me taksat e të cilit janë shkolluar, pesë vjet dhe më pas të marrin diplomën, duke patur liri zgjedhjeje që të qëndrojnë apo ikin. /tesheshi.com/
