Kina po përballet me një rritje të infeksioneve me një virus të “ri” të frymëmarrjes, duke çuar në spitale të mbipopulluara, masa urgjente dhe shqetësim publik për shpërthimin. Konkretisht, në provincat veriore të Kinës këtë dimër, sidomos tek fëmijët, ka pasur rritje të rasteve të infektimit me këtë virus të “ri”.
Edhe pse historitë për një “virus misterioz” në Kinë po përhapen në rrjetet sociale dhe videot të kujtojnë ato të pesë viteve më parë, në fillim të pandemisë COVID-19, e cila vrau shtatë milionë njerëz, ky virus është identifikuar si metapneumovirus njerëzor (HMPV).
Megjithatë, Pekini zyrtar e minimizon rëndësinë e këtij zhvillimi si një “fenomen vjetor dimëror”. Sipas British Independent, zëdhënësi i Ministrisë së Jashtme kineze Mao Ning tha të premten: “Infeksionet e frymëmarrjes priren të arrijnë kulmin gjatë stinës së dimrit, por ato janë më pak të rënda dhe përhapen në një gamë më të vogël krahasuar me vitin e kaluar”.
Çfarë është HMPV?
Metapneumovirusi i njeriut ose HMPV është një virus respirator që shkakton simptoma të ngjashme me të ftohtin dhe gripin e zakonshëm. Megjithëse sëmundja është zakonisht e lehtë, ajo mund të çojë në komplikime serioze si pneumonia, veçanërisht tek foshnjat, të moshuarit dhe ata me sistem imunitar të dobësuar.
Virusi nuk është i ri, por ai ka tërhequr vëmendjen mes një rritjeje të rasteve, veçanërisht tek fëmijët nën 14 vjeç në Kinën veriore. I identifikuar për herë të parë në vitin 2001, HMPV është një virus ARN që përhapet përmes frymëmarrjes ose kontaktit me sipërfaqet e kontaminuara. Infeksionet janë identifikuar më parë në vende të ndryshme.
Simptomat e saj përfshijnë kollën, ethe, kongjestion nazal dhe lodhje, me një periudhë inkubacioni prej tre deri në gjashtë ditë. Ndryshe nga COVID, nuk ka vaksinë apo trajtim specifik antiviral për HMPV; trajtimi përfshin kryesisht menaxhimin e simptomave.
Rastet në rritje të HMPV në Kinë
Rritja në raste përkon me motin më të ftohtë, kushte që zakonisht nxisin përhapjen e viruseve të frymëmarrjes. Zyrtarët shëndetësorë theksojnë se kjo valë është në përputhje me tendencat sezonale. Administrata Kombëtare e Kinës për Kontrollin dhe Parandalimin e Sëmundjeve raportoi kohët e fundit një rritje të infeksioneve të frymëmarrjes, përfshirë HMPV, gjatë dimrit. Organizata Botërore e Shëndetësisë (OBSH) nuk e ka cilësuar situatën si një emergjencë globale, por rritja e rasteve ka shtyrë autoritetet të forcojnë sistemet e monitorimit. Një program pilot i mbikëqyrjes së pneumonisë është nisur, duke siguruar që laboratorët dhe agjencitë shëndetësore të raportojnë dhe menaxhojnë rastet në mënyrë më efektive.
A mund të përhapet virusi HMPV në vende të tjera?
Hong Kongu ka raportuar disa raste të HMPV. Vendet fqinje si Kamboxhia dhe Tajvani po monitorojnë nga afër situatën. Departamenti i Kontrollit të Sëmundjeve Infektive të Kamboxhias ka lëshuar paralajmërime për HMPV, duke vënë në dukje ngjashmërinë e tij me infeksionin COVID-19 dhe gripin. Qendrat për Kontrollin e Sëmundjeve të Tajvanit thanë se virusi paraqet një rrezik më të madh për fëmijët, të moshuarit dhe ata me sistem imunitar të dobësuar.
Në Indinë fqinje, zyrtarët thanë se nuk kishte nevojë për panik pasi HMPV ishte “si çdo virus tjetër i frymëmarrjes”.
“Ka pasur lajme për një shpërthim të metapneumovirusit në Kinë. Më lejoni të jem shumë i qartë për këtë. Metapneumovirusi është si çdo virus tjetër i frymëmarrjes që shkakton ftohjen e zakonshme”, tha një zyrtar shëndetësor në Indi.
Gjithashtu, duke qetësuar qytetarët dhe turistët, një zëdhënës i ministrisë së jashtme kineze tha: “Mund t’ju siguroj se qeveria kineze kujdeset për shëndetin e qytetarëve kinezë dhe të huajve që vijnë në Kinë. Është e sigurt të udhëtosh në Kinë.” /tesheshi.com/
