Presidenti sirian, Bashar al-Assad thotë se dëshiron të kujtohet pas dhjetë vjetësh nga tani, si personi që shpëtoi Sirinë. Komenti vjen në një intervistë që presidenti sirian, vendi i të cilit ndodhet prej pesë vjetësh në luftë civile, ka dhënë për të përditshmen spanjolle El Pais.
Assad, e ardhmja e të cilit ka qenë një pikë ngërçi në përpjekjet për t’i dhënë fund luftës së përgjakshme civile në vend, e ka lënë të hapur mundësinë që ai të jetë ende president pas dhjetë vjetësh. Ai tha se është i gatshëm të zbatojë një armëpushim të shumëkërkuar, por vetëm nëse kryengritësit dhe mbështetësit e tyre, si Turqia, të mos përdorin as edhe shansin më të vogël për të fituar terren.
“Pas dhjetë vjetësh, nëse mund ta shpëtoj Sirinë si president – por kjo nuk do të thotë se do të jem president pas dhjetë vjetësh, jam duke folur vetëm për vizionin tim për këto 10 vjet”, thotë ai në intervistën e publikuar në gazetë.
“Nëse Siria është e sigurtë dhe e shpëtuar, dhe unë jam ai që e shpëtoi vendin e vet, – kjo është detyra ime tani, kjo është puna ime”.
“Nëse populli sirian do që unë të jem në pushtet, do të jem. Nëse ata nuk më duan, nuk mund të bëj gjë, dua të them, nuk mund të ndihmoj vendin tim e më duhet të largohem menjëherë”.
Liderët botërorë po nxisin përpjekjet për ndaljen e veprimeve të dhunshme në Siri për të hapur rrugën për negociata të reja paqeje, por marrëveshja duket e pazbatueshme ndërsa luftimet në terren janë intensifikuar.
Në një tjetër intervistë dhënë më 12 Shkurt, përpara njoftimit të marrëveshjes, Assad sfidoi duke u zotuar të rimarrë në kontroll të gjithë vendin. Duke folur për El Pais, ai tha se ishte “gati” për armëpushim, por paralajmëroi se armëpushimi nuk duhet të shfrytëzohet nga “terroristët” për të përmirësuar pozicionet e tyre, duke përdorur termin e regjimit për grupet kryengritëse.
“Ka të bëjë me ndalimin e vendeve të tjera, sidomos Turqisë, që të dërgojnë rekrutë të tjerë, terroristë të tjerë, armatime të tjera apo çdo lloj mbështetje logjistike për këta terroristë”.
Regjimi sirian ka shtuar presionin me anë të një ofensive në veri, në rajonin e Alepos mbështetur nga sulmet ajrore ruse dhe trupa nga Irani e Hezbollahët e Libanit. Kjo ofensivë ka detyruar me mijëra njerëz të largohen nga shtëpitë e tyre.
Assad tha se mbështetja e aleatëve të tij rusë dhe iranianë ka qenë “thelbësore” në përparimin e madh të kohëve të fundit të trupave të regjimit.
“Përfundimisht kemi nevojë për këtë ndihmë për një arsye të thjeshtë: për shkak se më shumë se 80 vende mbështesin terroristët në mënyra nga më të ndryshmet”, tha ai. Disa mbështetës ndihmojnë “drejtpërdrejt me para, ndihmë logjistike, me armatime e rekrutë. Disa të tjerë i mbështesin politikisht, në forume të ndryshme ndërkombëtare”. Përgatiti: Juli Prifti – /tesheshi.com/
