Raportimi më i fundit i rrjetit informativ britanik BBC flet për pesë të vdekur e 40 të plagosur nga sulmi i djeshëm në Londër; mes të vdekurve është dhe njeriu përgjegjës për gjakderdhjen.
Sulmi i orëve të pasdites të së mërkurës nisi kur një person i vetëm i mori përpara njerëzit me makinën e tij në “Westminster Bridge”, pranë parlamentit në qendër të Londrës.
Pasi la të vdekur tre persona dhe shumë të plagosur, sulmuesi u drejtua për nga parlamenti me një thikë në dorë, me të cilën qëlloi një punonjës policie, që po ashtu humbi jetën. Për t’u qëlluar vetëm më pas nga forcat policore, që e hodhën përdhe të vdekur.
Nga policia nuk ka ende një emër për sulmuesin, por shefi i kundërterrorizmit dhe i policisë metropolitane, Mark Rowley, deklaroi se ata mendonin se e dinin se kush ishte, e se ishte i frymëzuar nga terrorizmi ndërkombëtar. Megjithatë, ai nuk pranoi të jepte hollësi të mëtejshme.
“Vendndodhja e këtij sulmi nuk ishte rastësi,” tha kryeministrja britanike Theresa May në reagimin e saj pas ngjarjes.
“Terroristi zgjodhi të godasë në zemër të kryeqytetit tonë, ku njerëzit e të gjitha nacionaliteteve, feve dhe kulturave mblidhen së bashku për të kremtuar vlerat e lirisë, demokracisë dhe të lirisë së fjalës.” /tesheshi.com/
