Forma shumë e dobët që po kalon skuadra nga Old Traford, ka shtyrë drejtuesit e klubit të mendojnë seriozisht pozicionimin e trajnerit holandez, Luis Van Gaal. Mediat në ishull tashmë kanë filluar spekulimet se kush mund të drejtojë Manchester United, ndwrkohë që emrat e legjendave të klubit, Ryan Giggs dhe Gary Neville, së bashku me spanjollin Pep Guardiola mbeten në pole-position.
Surprizuese mund të jetë ardhja e një ish-legjende tjetër e klubit, Mark Hughes, i cili po bën mrekullinë me skuadrën Stoke City. Mund të mos jetë një zgjedhje e bujshme, duke marrë parasysh famën e madhe që kanë pretendentët e tjerë, mirëpo “tesheshi.com”, transmeton pesë arsyet pse Mark Hughes duhet të drejtojë Manchester United.
1. Luan futboll atraktiv
Një ndër problemet kryesore të holandezit, Van Gaal, është pikërisht loja e bukur, për të cilën nuk po arrin të bind opinionin dhe publikun, madje as në ato ndeshje të cilat ka regjistruar rezultate pozitive. Ndërkohë, Hughes shquhet për atraktivitetin e lojës në skuadrën e tij, madje shpesh herë ishte krahasuar edhe me Barcelonën.
Fitore ndaj skuadrave të mëdha, Chelsea, Manchester United apo Manchester City, janë vetëm njëra ndër arsyet. Mirëpo kur kujtojmë që në këto ndeshje ka mbajtur portën e paprekur, atëherë kemi të bëjë më një skuadër superofensive.
2. Puna e mirë në Blackburn dhe Stoke
Uellsiani ka regjistruar rezultate mjaft të mira në çdo skuadër që e ka udhëhequr. Pas më shumë se 40 viteve, ka udhëhequr Blackburn Rovers drejt gjysmëfinales së FA Cup, qysh në sezonin e tij të parë të punës në Ewood Park, ndërsa në sezonin e rradhës e kishte renditur skuadrën në vendin e gjashtë të klasifikimit.
Ndërkohë, Stoke City-n e ka ringritur sërish në mesin e artë të skuadrave në Premier Ligë, madje është bërë ankth i tmerrshëm për skuadrat e mëdha.
3. Ndikimi tij për të nënshkruar me yjet
Ardhja në Stoke City e futbollistëve Bojan Krkiç, Xherdan Shaqiri apo Marko Arnautoviç, veçse e forcon ndikimin e tij tek futbollistët, ndërkohë që edhe në periudhën sa ishte trajner i Blackburn Rovers, kishte nënshkruar me emra të mëdhenj si; Roque Santa Cruz, Benni McCarthy dhe David Bentley.
Dhe ishte pikërisht Hughes ai që kishte transferuar tek citizens Vincent Kompany, Pablo Zabaleta, Carlos Tevez, Gareth Barry, Nigel De Jong dhe Joleon Lescott.
4. Një fitues i lindur
Është më se e natyrshme të mendosh se një futbollist i mirë, mund të mos jetë edhe një menaxher i mirë, mirëpo Mark Hughes, tashmë ka shijuar ndjesinë e të fituarit tituj me Manchester United, në kohën që ishte lojtar në Old Traford.
Titujt që ka fituar Hughes si lojtar:
Manchester United
Premier League – 1992/93, 1993/94
FA Cup – 1984/85, 1989/90, 1993/94
League Cup – 1991/92
Charity Shield – 1990, 1993, 1994
Cup Winners’ Cup – 1990/91
Uefa Super Cup – 1991
Chelsea
FA Cup – 1996/97
League Cup – 1997/98
Cup Winners’ Cup – 1997/98
Blackburn Rovers
League Cup – 2001/02
5. I njeh traditat e klubit
Giggs dhe Neville mund të kenë punuar nën urdhërat e Sir Alex Fergusonit, mirëpo edhe Hughes e ka bërë një gjë të tillë, madje për shtatë sezone, duke marrë pothuajse në përpikmëri modelin e tij si trajner.
Është e vështirë të përsëritësh historinë dhe suksesin e skocezit, mirëpo filozofinë dhe disiplinën që Hughes ka sjellë tek skuadra Stoke City, realisht mund të jetë një zgjidhje shumë më e mirë se Luis Van Gaal apo edhe se Jose Mourinho, një ndër kandidatët e mundshëm për t’i drejtuar “djajtë” në vazhdim të kampionatit.
/tesheshi.com/
