Bisedimet e shpresuara që të nisin më 25 janar në Gjenevë midis palëve në luftën siriane, grupeve opozitare dhe qeverisë së presidentit Beshar Esad, janë në dyshim për shkak të mospërpilimit ende të listës së këtyre grupeve.
Përpilimi i kësaj liste nuk është diçka e thjeshtë, e për këtë arsye sekretari i përgjithshëm i OKB-së, Ban Ki-Moon, i ka nxitur vendet që mbështesin opozitën siriane në konflikt t’i dyfishojnë përpjekjet për të rënë në një mendje se ç’grupe opozitare duhen ftuar në bisedimet e paqes.
I dërguari i posaçëm i OKB-së për Sirinë, Staffan de Mistura, e informoi të hënën Këshillin e Sigurimit për bisedimet në një takim me dyer të mbyllura, por pajtimi për grupet opozitare që duhen ftuar nuk duket ende në horizont.
Shtyrja e bisedimeve është mundësia që ka dalë tashmë në plan të parë, e pohuar dhe nga një numër diplomatësh.
Bisedimet e planifikuara për më 25 janar në Gjenevë janë pjesë e procesit të paqes të mbështetur nga Këshilli i Sigurimit të OKB-së. /tesheshi.com/
