Gruaja në krye të Byrosë Kombëtare të Hetimit (BKH), Aida Hajnaj, tha në mbyllje të procesit të aplikimit për hetues në këtë strukturë, se gjithçka – pra, përzgjedhja e aplikantëve – do monitorohet nga ndërkombëtarët.
“Falenderoj edhe njëherë të gjithë kandidatët që kanë aplikuar dhe ju garantoj që procesi i përzgjedhjes do të jetë një proces i drejtë, objektiv, transparent, dhe i barabartë, duke identifikuar kandidatët/et më të mirë, të cilët do të punojë ngushtësisht dhe nën drejtimin e Prokurorëve të Posaçëm për të hetuar veprat penale në fushën e korrupsionit dhe krimit të organizuar dhe do të garantojë një strukturë të pavarur nga çdo ndikim i paligjshëm, i brendshëm apo i jashtëm.
Procesi i përzgjedhjes do të asistohet dhe monitorohet nga afër nga Komisioni Ndërkombëtar i Ekspertëve që garanton transparencë dhe objektivitet maksimal në këtë process”, tha Hajnaj në një deklaratë publike.
Kujtojmë se BKH, ashtu si dhe SPAK, është struktura tjetër me investim të fortë ndërkombëtar, i cili synon të godasë pandëshkueshmërinë e të paprekishmit në 30 vjet. /tesheshi.com/
