Berlini dhe rajoni përreth po shënojnë 62-vjetorin e ndërtimit të Murit të Berlinit, duke bërë homazhe për të gjitha viktimat e regjimit të ish-Gjermanisë Lindore.
Duke marrë pjesë në disa ngjarje përgjatë ish-kufirit që ndanë fizikisht Gjermaninë Lindore nga Gjermania Perëndimore më 13 gusht 1961, përfaqësuesit e politikanëve dhe shoqërisë gjermane u bëjnë homazhe njerëzve që vdiqën ose u vranë duke u përpjekur t’i shpëtonin regjimit të atëhershëm komunist të Republikës Demokratike Gjermane (RDGJ).
Përvjetori është gjithashtu një mundësi për të nderuar të gjitha familjet që u ndanë me dekada dhe për të gjithë ata që vuajtën për shkak të kufizimeve të rënda të lirive.
“Muri ndau familjet, miqtë, shkuli njerëzit nga komunitetet e tyre dhe shkaktoi vuajtje të jashtëzakonshme”, tha Bodo Ramelow, zyrtar i dikurshëm i RDGJ-së.
Ramelow jua drejtoi këto fjalë të gjithë atyre që u “privuan nga liria, të cilët u spiunuan, u persekutuan, u përjashtuan dhe u burgosën”.
Homazhet përfshijnë një meshë në Berlin si dhe një ceremoni të vendosjes së kurorave në emër të qeverisë në një pllakë përkujtimore në Bernauer Strasse pranë Mauerpark të Berlinit.
Një homazh i bëhet edhe 18-vjeçarit të atëhershëm Peter Fechter, i cili u qëllua nga rojet kufitare dhe u la
të gjakoset për vdekje në mur në gusht 1962, një vit pasi u ngrit muri. Më pas një turmë u mblodh në anën perëndimore të murit, por nuk mundi ta ndihmonte Fechterin sepse ai ra në anën lindore dhe rojet kufitare nuk donin ta ndihmonin.
Përkujtimi zhvillohet në Zimmerstrasse pranë kalimit të famshëm të pikës së kontrollit Charlie.
Në qytetin e afërt të Teltow në Brandenburg, politikanët e rajonit u bëjnë homazhe dy viktimave, përkatësisht Peter Mädler dhe Karl-Heinz Kube, të cilët u vranë në 1963 dhe 1966 në një përpjekje për t’u arratisur.
Ribashkimi i vendit
Muri u ndërtua kryesisht për të ndaluar eksodin e gjermanëve nga lindja në perëndim, pasi humbja e fuqisë punëtore ngadalësoi ekonominë. Udhëheqësit e RDGJ-së në atë kohë shpjeguan se muri mbronte qytetarët e atij vendi nga kapitalizmi.
Muri në kryeqytetin gjerman ishte afërsisht 155 kilometra i gjatë dhe ndau komunitete të tëra njerëzish për më shumë se 28 vjet.
Pjesa e mbetur e Gjermanisë Lindore, përveç Berlinit Lindor, përbëhej nga pesë shtetet federale gjermane të shkëputura nga Republika Federale e Gjermanisë në verën e vitit 1952, kur shërbimet e sigurimit të Gjermanisë Lindore krijuan një zonë të gjerë pesë kilometra përgjatë kufirit me Gjermaninë Perëndimore.
Sipas Fondacionit “Muri i Berlinit”, të paktën 140 njerëz u vranë në vetë murin në përpjekje për t’u arratisur nga Gjermania Lindore.
Muri u rrëzua më 9 nëntor 1989, në një përmbysje tronditëse të autoriteteve të Gjermanisë Lindore, pas së cilës vendi u ribashkua. /tesheshi.com/
