Arkivi Shtetëror kujton ikjen nga kjo jetë të Hasan Prishtinës, ndodhur në Selanik, pas një atentati ndaj tij.
Nga Arkivi ofrohet një rezyme e shkurtër mbi këtë figurë kombëtare, eshtrat e të cilit prehen në Kukës.
“Më 14 gusht, ndërroi jetë në Selanik pas një atentati, Hasan Prishtina.
Lindi në Vushtri të Kosovës më 1873. Kreu Gjimnazin Francez në Selanik dhe shkollën e lartë të administratës osmane ‘Mylkije’ në Stamboll. Ishte tri herë deputet në parlamentin osman. Bashkë me Ismail Qemalin, ishte ndër nismëtarët e Kryengritjes së Përgjithshme Kundërosmane, e më pas ministër i Qeverisë së Përkohshme të Vlorës. Më 1913, ishte ndër organizatorët e kryengritjes kundërserbe të shtatorit, kurse më 1918 u zgjodh anëtar i Komitetit ‘Mbrojtja Kombëtare e Kosovës’.
Më 1921 u zgjodh deputet i Dibrës në Këshillin Kombëtar dhe u ngarkua nga Këshilli i Lartë për të ndërtuar qeverinë më 7 dhjetor 1921. Në periudhën 1922-23 u shqua si një nga figurat e opozitës në Shqipëri, kurse më 1924, teksa udhëhiqte lëvizjen e armatosur kaçake në Kosovë kundër sundimit serb, mori pjesë edhe në përgatitjen e Revolucionit të Qershorit në Shqipëri. U kthye në Tiranë më 1924, por u largua më 1925, për të jetuar në mërgim, deri në vdekje.
Pas atentatit, Hasan Prishtina u varros në varrezat e Selanikut, nga ku u soll në Shqipëri më 1977, për t’u rivarrosur në Varrezat e Dëshmorëve të qytetit të Kukësit. Fotografitë që sjellim këtu ruhen në Fototekën e Arkivit Qendror Shtetëror (AQSH) dhe paraqesin ceremonialin shtetëror të rivarrimit të eshtrave të Hasan Prishtinës në Kukës më 6 dhjetor 1977”. /tesheshi.com/
