Në këtë 16-vjetor të tragjedisë së Gërdecit, ku humbën jetën 26 persona, mes tyre dhe fëmijë, gjatë një shpërthimi në fabrikën e demontimit të armëve, personazhi kryesor, Zamira Durda, e cila humbi të birin e saj 7-vjeçar, tha se nëse nuk ngrihet akuza për vrasje, atëherë familjarët do të bëjnë vetë drejtësi.
“Ministri(Fatmir Mediu) nuk pranoi t’i përgjigjet pyetjeve të SPAK e kjo ishte vrastare për ne. Po zhgënjehem nga dita në ditë. Nuk janë 26 zogj. Djali im ka 16 vite që tretet. Të gjithë kanë dijeni për këtë që ndodhte këtu. Nëse nuk ka drejtësi, do ngrihemi vetë e do bëjmë drejtësi”, tha ajo.
Ajo tha se është kundër dënimeve me dy vite burg për shpërdorim detyre dhe apeloi që të ngrihen akuza për vrasje ndaj ish-zyrtarëve të lartë të përfshirë në Gërdec, duke iu referuar gjyqit në zhvillim që po kryhet për ish-ministrin Mediu.
“Unë do të bërtas, le të më nxjerrin përjashta. Do ta ngre zërin. Është krim shtetëror, duhet të hetohet e gjithë piramida, nga presidenti, të gjithë kanë qenë në dijeni”, tha ashpërsisht ajo. /tesheshi.com/
