Presidenti turk, Recep Tayyip Erdogan përcolli një fjalim emocional përpara mijëra njerëzve në Stamboll në përvjetorin e grushtit të dështuar të shtetit. Erdogan tha se njerëzit atë natë nuk mbanin armë, por një flamur dhe më e rëndësishmja, ata kishin besimin.
Në fjalim, ai doli në mbështetje të dënimit me vdekje për komplotistët dhe tha se ata duhet të veshin uniforma të stilit Guantanamo Bay.
Rreth 250 persona humbën jetën dhe 2,196 të tjerë u plagosën natën e 15 korrikut të kaluar, kur një fraksion i Ushtrisë organizoi grushtin e shtetit. Që prej asaj kohe, janë pushuar nga puna më shumë se 150 mijë nëpunës në një operacion për ç’rrënjosjen e komplotistëve.
Erdogan e mbajti fjalimin e tij përpara mijëra turqve të mbledhur në urën mbi Bosfor ku civilët u përballën me ushtarë të armatosur të grushtit të shtetit.
“U jam mirënjohës gjithë pjesëtarëve të kombit tim që mbrojtën vendin e tyre”, tha Erdogan.
Presidenti zbuloi memorialin e Martirëve në urë, që ka nisur të quhet Ura e Martirëve të 15 Korrikut. /tesheshi.com/
