![Një ushtar izraelit qëndron me kompleksin e Xhamisë Al-Aksa në sfond [Dosje: Maya Alleruzzo/AP Photo]](https://tesheshi.com/wp-content/uploads/2024/12/Kolonet-izraelite-shkelin-status-quo-ne-ne-kompleksin-e-xhamise-Al-Aksa-360x180.webp)
Nga Mark Brunga
U mbushën 70 vjet që nga përfundimi i një prej luftrave më të përgjakshme e më tragjike: të Dytës Botërore. 9 Maji 1945 shënohet si data simbol e fitores mbi nazi-fashizmin dhe forcat e paktit famëkeq Romë- Berlin- Tokio.
Rreth 62 milion njerëz u vranë në këtë luftë, shifër kjo e barabartë me 2.5% e popullsisë së të gjithë planetit.
Nazistët, gjatë fushatave pushtuese që zhvilluan, shkrumbuan e rrënuan popuj dhe shtete, por u shkrumbuan edhe vetë duke pasur një fund të rëndë.
Një fund të rëndë e trishtë që simbolizohet dhe në 2 foto, ku në njërën paraqiten tankistë gjermanë të bërë shkrumb nga artileria apo bombat e aviacionit, e në tjetrën pamja makabër e një trupi tankisti gjerman krejtësisht të karbonizuar nga zjarri që ka shkaktuar mbi tank artileria e trupave te koalicionit të madh antifashist Anglo-Amerikano-Sovietik, të cilën oficerët amerikanë po e nxjerrin me mjete rrethanore.
Dhe më pas turmat e mëdha të robërve të kapura nga trupat sovietike dhe Anglo-Amerikane, pas zbarkimeve ne Normandi dhe Itali. Dhe një Berlin simbol të kështjellës së “Rendit të Ri ” të bërë rrënojë nga aviacioni dhe artileria e trupave fitimtare të Luftës së Dytë.
Ironia
Por në këtë tragjedi shumëkombëshe dhe shumëplanëshe, vërehet se kanë qënë edhe vetë ushtarët gjermanë që kanë parashikuar fundin e kësaj lufte.
Mes shumë materialeve që janë qëmtuar, po sjellim nje rast kur në vendin e një numërori topi mitik të ushtrisë gjermane 88mm, një nga pjestarët e numerorëve të topit ka fotografuar si ushtar gjerman një qen. Ky tip topi është shquar në betejat e zhvilluara në luftën kundër tankeve si dhe në përbërje të baterive të artilerisë bregdetare. Dhe për këtë, fotoja është kompozuar pikërisht në shasinë e tij.
Fotoja është bërë kur mbase trupat gjermane po mobilizoni “hitlerjungenin” deri në moshën 12 vjeçare. Dhe pasi janë bërë dhe keto mobilizime artisti ushtarak ka zgjidhur të rekomandojë në mënyrë ironike mjaft të hollë, një qen pra të veshur ushtar, sepse nuk kishte mbetur më njeri pa u mobilizuar. Qeni pozon i veshur me uniforme ushtarake në një arkë municionesh pranë grykës së topit që nuk gjuan më dhe mban mbi kokë një helmetë dhe një palë dylbi. Ironi me makinën ushtarake më perfekte të asaj periudhe, por që i kishte skaduar tashmë karburanti!
Dhe fëmijët-ushtarë duken se si dekorohen për t`u dhënë zemër, duke i lënë më pas në mëshirë të fatit përballë trupave të rregullta të ushtrive nga më të fuqishme të asaj periudhe, kur perandoria e Rajhut të Tretë po perëndonte në një det të përgjakur, kur ushtritë e Lindjes dhe të Përendimit i ishin vërsulur si dinozaurë të tërbuar për ta ndëshkuar për të këqijat që i kishin shkaktuar njerëzimit.
Ceremonia e dekorimit dhe me pas e dorëzimit përballë tytave të armëve të këtyre fëmijëve të mobilizuar, është tragjike. Një tragjedi që u përsërit disa dekada më pas me fëmijët e armatosur te Kamboxhias dhe që ndeshet dhe sot në shumë vënde të Afrikës. Dhe është fatkeqësi që ende sot, politikanë e ushtarakë nuk arrijnë që të vënë mend nga traumat e së shkuarës. Madje edhe fitimtarët e dikurshëm që i vujtën aq shumë pasojat e luftës duke lënë në fushat e betejave me miliona te vrarë, nuk nxjerrin mesimet e duhura.
70 vite pas fitores së madhe popujt ndjekin me shqetësim se si trupat ruse që i mbuluan dikur me lavdi sheshbetejat kundër ushtrive naziste, tashmë provokojnë luftëra të reja pikërisht në vendet ku luftuan me nazistët, si në territorin e Ukrainës dhe me gjërë.
Një foto që tregon trupat gjermane të kapura rob në Kiev, mbase do të ishte mjaft domethënëse që të frymëzojë shtetet që të punojnë për paqen mes popujve dhe jo për luftëra të reja.
Fundi i agresorëve është thuajse i njëjtë në të gjitha kohërat. Këmbanat e 9 Majit vazhdojnë të bien për ata që kanë veshë! /tesheshi.com/
