Nuk është e vështirë të gjenden arsye për ndjenjat e largimit nga Bashkimi Europian që po rriten brenda Europës. Prodhimi i brendshëm bruto në zonën euro ka rënë për të gjashtin vit radhazi dhe papunësia ka kapur nivele rekord në shumë vende.
Gjermania vuan nga ndjesia se ka bërë gabim që ka ndihmuar financiarisht fqinjët plangprishës dhe marrëdhëniet e saj me Francën, që nga ana e vet ka rënë në recesion, ndodhen në dobësim e sipër.
Në Britani, kryeministri konservator përballet me një nga trazirat periodike brenda partisë së vet kundër anëtarësisë në BE.
Pavarësisht këtyre fakteve që njihen, shumëkënd që nuk bindet mund ta bëjë esëll një sondazh i ri i opinionit publik në Europë, zhvilluar nga Peë Research Centre e që konfirmon pjesën më të madhe të këtyre pohimeve e shumë më tepër se kaq.
Kur njerëzit në tetë vende u pyetën për bashkimin monetar dhe anëtarësinë në BE, shumë më pak prej tyre u shprehën në favor sesa një vit më parë. Por, ajo që tregon më shumë se çdo pyetje është ajo në lidhje me qëndrimin e qytetarëve të vendeve të ndryshme ndaj njëri-tjetrit.
Në përgjigjet e njerëzve mund të vërehen fare qartë stereotipe që nuk zhduken, mosbesim me baza historike dhe pak zemërim i kohëve të sotme që ka lidhje me pushtetin ekonomik.
Sondazhi konfirmon edhe një gjetje të habitshme nga vëzhgimi i një viti më parë: perceptimi i grekëve për veten e tyre është jashtë çdo bashkëveprimi me perceptimin e gjithë pjesës tjetër të Europës.
Siç tregon sondazhi, kur njerëzve u kërkohet t’i vënë emrin kombit më të besueshëm, të gjitha shtetet votuan për Gjermaninë përveç grekëve. Në vend të saj, ata ia atribuan vetes këtë “çmim”, ndërsa Gjermaninë e votuan si kombin më arrogant dhe më pak të dhembshur nga të gjithë të tjerët. (në sondazhin e vitit 2012, grekët e konsideruan veten si kombin më punëtor, duke shkaktuar humor të përgjithshëm)
Sidoqoftë, kjo antipasti nga gjermanëve është e kuptueshme. Si kontributori kryesor në fonde për zonën euro, Gjermania fajësohet për masat e ashpra të kursimit të imponuara mbi Greqinë si kusht për paketat e shpëtimit financiar të vendit.
Këto masa kanë rezultuar në krijimin e një cikli të rënies së rritjes ekonomike, dobësimit të kërkesës dhe vështirësive të vërteta jetësore. Në të vërtetë, dominimi ekonomik i Gjermanisë reflektohet në disa nominime që shteti ka marrë si vendi më arrogant dhe më pak i dhembshur.
Një gjetje tjetër befasuese është ndasia e opinioneve brenda vetë shteteve.
Polakët nominuan Gjermaninë në të dyja vlerësimet, edhe si më shumë e besueshme edhe si më pak e besueshme, e normalisht kjo mund të jetë një ndarje mes polakëve të moshuar që kanë ende kujtimet e luftës dhe ata më të rinj që admirojnë reputacionin e Gjermanisë për korrektesë.
Francezët po ashtu, duken me dy mendje sa i takon arrogancës së atyre vetë – edhe pse britanikët nuk kanë asnjë dyshim në lidhje me të.
Në përgjigjet e tyre, italianët janë më mosbesues ndaj njëri-tjetrit, ndoshta të vetëdijshëm për renditjen e keqe të vendit në listën e korrupsionit ndërkombëtar.
Sllovakët mund të mos dinë si të sillen me nominimin si kombi më i përulur nga fqinjët e tyre më të mëdhenj dhe një herë e një kohë, edhe bashkëpatriotë, çekët.
Përgatiti: Juli Prifti – /tesheshi.com/
