Nga Entela Canaj
Kur flasim për postierin, gjithmonë përfytyrojmë që ky profesion i shkon më shumë për shtat një burri. Por e vërteta është që në Shqipëri ka edhe shumë gra postiere, të cilat e bëjnë me përkushtim dhe dashuri këtë punë.
Nasije Plaku nga Durrësi është një nga postieret femra në Shqipëri, dhe ka 14 vjet që i dedikohet këtij profesioni. Çdo ditë shpërndan dhjetëra pako dhe fatura nëpër lagjiet e qytetit. Tregon se i pëlqen shumë kjo punë dhe nuk do preferonte ta ndërronte.
“Jam shpërndarëse poste në Durrës prej 14 vitesh. E bëj punën me mjaft dëshirë. Në fillim kur kam nisur më dukej pak e vështirë si jo e përshtatshme për një femër, por tani mendoj ndryshe dhe më ka hyrë aq shumë në zemër puna ime sa nuk do e ndërroja me asgjë. Më pëlqen shumë dhe them se është e e vetmja punë që do bëja me kënaqësi,” thotë zonja Nasije, e cila sot ka një arsye më shumë për tu ndier krenare me punën e saj, pasi është vlerësuar si postierja më e mirë, në qytetin e Durrësit, vlerësim ky që ka ardhur nga kolegët e saj, me një votim transparent.
Çmimi iu dha në formën e një certifikate nderi nga Posta Qendrore në Tiranë. Por edhe pse bëhet fjalë më shumë për një vlerësim moral se sa financiar, sytë e saj shkëlqejnë kur shikon certifikatën.
Puna e saj nis çdo mëngjes me paraqitjen në zyrën qëndrore të postës në Durrës dhe më pas del në terren për të shpërndarë zarfet apo pakot që kanë ardhur për banorët. Për të lëvizur përdor biçikletë ose lëviz në këmbë aty ku adresat janë afër.
“Në fillim më dukej puna e vështirë pasi kisha probleme për të gjetur adresat, por tani e njoh në pëllëmbë të dorës çdo cep të qytetit dhe nuk ndodh që të gabohem. Ka fluks pune sidomos kohët e fundit me dërgimin e pakove nga jashtë për familjarët, por megjithatë e përballojmë. Më shumë punë ka me zarfet me faturat, ndodh që shpërndahen edhe 300 zarfe në ditë dhe deri në 50 pako,” thotë zonja Nasie.
Edhe pse në mot me shi apo me temperaturat e larta të verës postierja Nasije Plaku e bën punën e saj me dëshirë dhe pasion, dhe jo pa qëllim u zgjodh postierja e vitit. I njëjti vlerësim u dha këtë të enjte nga Posta Qendrore e Tiranës, edhe për 15 postierë të tjerë, nga qytete të ndryshme të Shqipërisë.
‘Postieri i vitit’ është një iniciativë e nisur për herë të parë këtë vit, por që do të kthehet në një traditë të mirëfilltë çdo 1 Maj (Ditën e Punëtorëve), për të vlerësuar këtë punë fisnike që iu shërben të gjithëve. Posta Shqiptare numëron 2280 punonjës, të cilët punojnë në sektorë të ndryshëm, por ‘heronjtë; e vërtetë të shërbimit postar janë ‘postierët e terrenit’ të cilët dimër e verë, në mes të trafikut e rrëmujës, trokasin shtëpi më shtëpi për të dorëzuar porositë. /tesheshi.com/
