Nga Ahmet Zani
Dila Gjoka është 51-vjeç, nga fshati Adriatik i Kurbinit. E veçanta e saj është se i ka lehtësuar punë vetes duke qenë e hipur mbi një biçikletë. Me to shoqëron bagëtitë kur dalin për të kullotur, bën punët e bujqësisë e ato shtëpisë. Nënë e 5 fëmijëve, ajo u bë këtë trerrotësh me pedale nga Ndreca, djali i madh, i cili ia solli të ëmës dhuratë nga Italia ku punon e jeton.
“Fillimisht ishte shumë e vështirë për mua të ngisja këtë lloj mjeti, ngaqë mentaliteti i zonës ende vijon të trashëgohet, por lëvizja me këtë biçikletë ishte lehtësim i punëve në fshat. Disa banorë më shihnin me një tjetër sy, madje dhe duke më përfolur, ndërsa disa të tjerë më uronin nga kjo zgjidhje, duke e ditur se punët e mëdha në fshat krijojnë vështirësi për një grua. Në mëngjes pasi lëshoj në kullotë bagëtitë, larg nga qendra, nis e merrem me punët e shtëpisë dhe ato të bujqësisë. E gjithë ditë shoqërohet me aktivitet për familjen, ndërsa biçikleta më ka dhënë mundësinë dhe për transportin e prodhimeve. Deri në 50 kg, apo dhe më shumë i transportoj me këtë mjet ndërsa dikur të tilla ngarkesa isha e detyruar të mbaja në shpinë, dhe lodhja ishte akoma më e madhe”, thotë Dilja.
Banorët e zonës tashmë nuk e shohin Dilën si dikur dy vite më parë, të stërmunduar. Ndërsa ajo bekon të birin, me këtë dhuratë të çmuar për nënën 51-vjeçare e cila në një formë ka thyer tabunë, pasi pjesa e mirë e zonës janë banorë të ardhur nga zonat e veriut dhe verilindjes, ku fanatizmi ëndë mbizotëron në mendësinë e tyre. /tesheshi.com/
