Parlamenti Evropian ka ngritur zyrtarisht një padi kundër Komisionit Evropian për vendimin për të mos aktivizuar një mekanizëm të ri që i lejon atij të pezullojë financimin për anëtarët e Bashkimit Evropian (BE) që nuk respektojnë sundimin e ligjit, raporton DW.
Mekanizmi i lejon Bashkimit Evropian të pezullojë pagesat për shtetet anëtare në rast të shkeljes së dispozitave të sundimit të ligjit që prek interesat financiare të bllokut.
Deri më tani, Komisioni ka hezituar të përdorë mekanizmin, i cili ka hyrë në fuqi që nga janari i këtij viti, për shkak të kërkesës së liderëve evropianë për të pritur vendimin e Gjykatës Evropiane të Drejtësisë për ankesën e Polonisë dhe Hungarisë.
Lëvizja e Parlamentit Evropian është një mënyrë për t’i bërë presion Komisionit që të reagojë sa më shpejt të jetë e mundur dhe të ndërpresë fondet për vendet si Polonia dhe Hungaria, të cilat janë në mosmarrëveshje me Brukselin për akuzat për minimin e vlerave demokratike në ato vende.
“Ne presim që Komisioni Evropian të sillet në mënyrë konsistente dhe të përmbushë atë që Presidentja Ursula von der Leyen vuri në dukje në seancën e fundit plenare për këtë temë”, tha në një deklaratë presidenti i Parlamentit Evropian, David Sasoli.
Ai shtoi se fjalët duhet të përkthehen në vepra konkrete.
Dhjetë ditë më parë, Parlamenti Evropian miratoi një rezolutë që i bën thirrje Komisionit të nisë procedurat kundër Polonisë pasi Gjykata Kushtetuese polake nxori një vendim që vë në pikëpyetje përparësinë e ligjit evropian ndaj ligjit kombëtar.
Parlamenti ka paralajmëruar Komisionin se do të ngrejë një padi kundër tij për moszbatimin e mekanizmit të kushtëzimit në rastin e Polonisë.
Polonia dhe Hungaria kanë nisur procedurat para Gjykatës Evropiane të Drejtësisë në të cilën ata kërkuan të shqyrtohet nëse rregullorja për kushtëzimin është në përputhje me ligjin evropian.
Në verën e vitit 2020, kur liderët e BE-së ranë dakord për një buxhet shumëvjeçar për 2021-2027 dhe një plan rimëkëmbjeje të gjeneratës së ardhshme të BE-së, u arrit një kompromis që mekanizmi nuk do të zbatohej derisa Gjykata e Drejtësisë e BE-së të jepte opinionin e saj.
Parlamenti Evropian tani në fakt kërkon që kjo marrëveshje politike të mos respektohet, por thekson se mekanizmi është në fuqi dhe duhet të zbatohet. /tesheshi.com/
