Prokuroria e Tiranës merr të pandehur zyrtarisht ish-drejtorin e ÇEZ, Josef Hejsek dhe specialistin Jan Ivan për akuzën e mashtrimit pasoja të rënda.
Akuzat u janë komunikuar me letër-porosi përmes ministrisë së Drejtësisë. Prokuroria kërkon që dy ish-zyrtarët e ÇEZ të pyetën si të pandehur në procesin ndaj Kastriot Ismailajt. Josef Hejsek, ka qenë kreu i bordit drejtues të CEZ-Shpërndarje në vitin 2012, kohë në të cilën Ismailaj në rolin e administratorit të DIA-s ka lidhur kontratën me CEZ për mbledhjen e borxheve.
Por ky vendim rrezikon të dalë nul pasi ministria e Drejtësisë së Çekisë padyshim që do të refuzojë që një shtet tjetër i merr të pandehur shtetasin e vet pa kaluar në fazën fillestare të hetimeve.
Sokol Hazizaj një jurist i njohur i tha tesheshi.com se nuk e njihte situatën konkrete, por si ish-zv.ministër i Drejtësisë theksoi se procedura të tilla nuk bëhen kaq lëmsh pasi kërkojnë një lloj qepjeje ligjore.
Hejsek ishte zgjedhur nga përfaqësuesit çekë të CEZ SH.A pasi kjo kompani zotërohej nga këta të fundit, ndërsa aksioner ishte dhe shteti shqiptar. Kontrata DIA-CEZ u rrëzua në vitin 2010 ndërsa në tetor të 2011, por sipas Prokurorisë, Ismailaj arriti ta lidhë atë dhe, në bashkëpunim me Hejsek duke i paraqitur CEZ-it fatura dhe dokumentacione fiktive e false, arriti të marrë 512 milionë lekë. Për këto para tashmë Kastriot Ismailaj është në statusin e personit të pandehur.
Por lidhur me këtë hap të prokurorisë ka reaguar nga burgu Kastriot Ismailaj, ish-adminstrator i DIA, i pandehur në aferën e CEZ-DIA. “Si mund të hetoni kur Parlamenti ka miratuar një ligj sipas të cilit ju ndalon që ju t’i hetoni. Po dilni mbi ligjin”.
Këto zhvillime vijnë pasi Komisioni Hetimor parlamentar për çështjen “CEZ” në fillim të shkurtit nisi zyrtarisht procedurat për të marrë dëshminë e ish-drejtorit të CEZ në Shqipëri, Josef Hejsek, i cili do të pyetet për prapaskenat e privatizimit të OSHE, personat e përfshirë, raportet me sekserin Nuel Kalajn, për favorizimet, kontratat dhe për çdo shkelje në dëm të shtetit shqiptar.
Po ç’ndodh tani? Nëse refuzon Ministria e Drejtësisë së Çekisë ta ekstradojë, dështon dhe hetimi. /tesheshi.com/
