Siç bën të ditur BBC-ja, protestat antiqeveritare në Rumani janë përshkallëzuar me daljen në rrugë të mijëra njerëzve në kryeqytetin e vendit.
Në Bukuresht është zhvilluar një prej protestave më të mëdha antiqeveritare; më së paku 150.000 njerëz u raportuan të kenë qenë para zyrave qeveritare në orët e mbrëmjes të së mërkurës. Ndërkohë që protestat nuk janë kufizuar vetëm në kryeqytet; të tilla janë parë dhe në qytete të tjera të Rumanisë.
Zemërimi i rumunëve ka marrë hov nga një dekret i miratuar të martën, e që mund t’u japë mundësi dhjetëra zyrtarëve të arrestuar për korrupsion që të lënë qelitë e burgut.
Qeveria e majtë e kryeministrit Sorin Grindeanu e justifikon miratimin e dekretit me nevojën për të liruar hapësira në burgjet e mbipopulluara, kurse kritikët e tij thonë se ai po kërkon të lirojë aleatët e dënuar për korrupsion.
“Hajdutë, hajdutë,” ishte një prej thirrjeve të protestuesve në rrugët e Bukureshtit, ndaj të cilëve u hodh gaz lotsjellës nga policia. /tesheshi.com/
