Pasi përshëndeti krijimin e SPAK-ut, PD vendos të mos pranojë kreun e saj, prokurorin shkodran Arben Kraja.
Dalja së fundi e një dokumenti me firmë të këtij të fundit, për një proces të dy shkelësve të kufirit në ’90, ka bërë që PD të ndihet nën presion e të shpallë mosdakortësinë e saj që Prokoruria e Posaçme e dalë nga Reforma në Drejtësi, instanca e projektuar për të goditur deri dhe politikën, të drejtohet nga Kraja.
“Partia Demokratike nuk mund të qendrojë indiferente ndaj 2 fakteve të rënda, të bëra publike nga media online, që venë në dyshim serioz integritetin e kësaj strukture!
Një dokument i Korrikut 1990, i bërë viral ditën e djeshme, ka zbuluar se Drejtuesi i SPAK-ut Arben Kraja, ka marrë pjesë në procese politike, duke i shërbyer regjimit diktatorial deri në grahmat e tij të fundit.
Partia Demokratike ka bindjen se një ushtar i diktaturës më të egër në Europë, që dënon qytetarët me motivacionin “për dëmtim të moralit komunist”nuk mund të jetë shërbëtor i shtetit të së drejtës. Përveçse një hetues i diktaturës, drejtuesi i SPAK-ut, Arben Kraja, është propozuar nga PS si zëvendëskryetar i KLSH dhe ka punuar në Kryeministri për qeverinë e PS”, deklaroi Sekretari i Përgjithshëm demokrat Gazmend Bardhi.
Për PD-në, ka një komplot politik në emërimin e tij, e kjo pas një fotoje ku shfaqet kreu i komisionit të ligjeve Ulsi Manja ulur në tavolinë me ish-kandidatin kryesor për drejtimin e SPAK-ut, Altin Dumani, për koiçidencë që të dy dibranë.
“Fakti i dytë i rëndë, edhe ky i bërë publik nga media online, është takimi një ditë para votimit, i Prokurorit Altin Dumani me përfaqësuesin e Partisë Socialiste, Ulsi Manja. Altin Dumani ishte një nga kandidatët kryesorë për drejtimin e SPAK dhe ky takim, siç analizon me të drejtë media, për të marrë në KLP votat e kontrolluara nga njëri prej klaneve në Partinë Socialiste, vendos në pikëpyetje profesionalizmin, pavarësinë dhe paanshmërinë e tij.
Minimalisht prokurori Dumani ka detyrimin t’i sqarojë opinionin publik motivin e takimit me Ulsi Manjën, një ditë përpara votimit në KLP”, tha Bardhi.
Kutjojmë se ditë më parë, PD nuk kontestoi aspak kreun e ri të Prokurorisë së Përgjithshme, Olsian Çela. /tesheshi.com/
